தமிழ் திரை உலகில் சில வணிக ரீதியிலான வெற்றிப் படங்களை வழங்கி பிரபல நட்சத்திரமாக திகழும் நடிகர் சந்தானம் கதையின் நாயகனாக நடித்திருக்கும் ‘லவ் பைட் ‘ படத்தின் அறிமுக காணொளி வெளியிடப்பட்டிருக்கிறது.
‘கான்ஜுரிங் கண்ணப்பன்’ படத்தை இயக்கிய இயக்குநர் செல்வின் ராஜ் சேவியர் இயக்கத்தில் உருவாகி வரும் ‘லவ் பைட்’ திரைப்படத்தில் சந்தானம், அபர்ணா தாஸ், ஆனந்தராஜ், மொட்டை ராஜேந்திரன், விடிவி கணேஷ், ரெட்டின் கிங்ஸ்லி, ஆதித்யா கதிர், முத்துக்குமார், நிரோஷா, கல்கி ராஜா உள்ளிட்ட பலர் நடித்திருக்கிறார்கள்.
எஸ். யுவா ஒளிப்பதிவு செய்திருக்கும் இந்த திரைப்படத்திற்கு பாக்ஸ்ன் இசையமைத்திருக்கிறார். சர்வைவல் திரில்லராக தயாராகி இருக்கும் இந்த திரைப்படத்தை ஏஜிஎஸ் ஃபிலிம் என்டர்டெய்ன்மென்ட் நிறுவனம் சார்பில் தயாரிப்பாளர்கள் கல்பாத்தி எஸ். அகோரம் – கல்பாத்தி எஸ். கணேஷ்- கல்பாத்தி எஸ். சுரேஷ் – ஆகியோர் இணைந்து தயாரித்திருக்கிறார்கள்.
இப்படத்தின் படப்பிடிப்பு விறுவிறுப்பாக நடைபெற்று வரும் தருணத்தில் இதன் அறிமுக காணொளி வெளியிடப்பட்டிருக்கிறது.
இதில் கிராமப்புற பின்னணியில் ஜோம்பிகளின் நடமாட்டமும் அவர்களிடத்தில் திருடனான சந்தானம் சிக்கிக் கொள்ளும் காட்சியும் இடம்பிடித்து ரசிகர்களிடத்தில் படத்தைப் பற்றிய எதிர்பார்ப்பை ஏற்படுத்தி இருக்கிறது.
இதன் காரணமாக இந்த காணொளி வெளியான குறுகிய கால அவகாசத்திற்குள் ஒரு மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்து வருகிறது.
