இலங்கை – அவுஸ்திரேலிய டெஸ்ட் தொடர் நாளை ஆரம்பம்

இலங்கைக்கு கிரிக்கெட் சுற்றுலா மேற்கொண்டுள்ள அவுஸ்திரேலிய கிரிக்கெட் அணிக்கும் இலங்கை அணிக்கும் இடையிலான இரண்டு போட்டிகள் கொண்ட டெஸ்ட் தொடரின் முதலாவது போட்டி நாளை புதன்கிழமை (29) காலி சர்வதேச கிரிக்கெட் மைதானத்தில் ஆரம்பமாகிறது.

தனஞ்ஜய டி சில்வா தலைமையில் களமிறங்குகின்ற இலங்கை அணியில் புதுமுக வீரரான ஷொனால் தினூஷ 15 பேர் கொண்ட இலங்கை கிரிக்கெட் குழாத்தில் இணைக்கப்பட்டுள்ளதுடன், ஓஷத பெர்னாண்டோவுக்கும்  மீள அழைக்கப்பட்டுள்ளார். இவர்கள் இருவரும் உள்ளூர் போட்டிகளில்  அண்மைக்காலமாக சிறந்த ஆட்டத்திறனை வெளிப்படுத்தியவர்கள் ஆவர்.

உபாதை காரணமாக இந்த தொடரில் பங்கேற்காத பெட் கம்மின்ஸுக்கு பதிலாக ஸ்டீவ் ஸ்மித் அவுஸ்திரேலிய அணிக்கு தலைவராக செயற்படவுள்ளார்.

உலக டெஸ்ட் சம்பியன்ஷிப் 2023/2025 இன் ஓர் அங்கமாக  இப்போட்டித் தொடர் நடத்தப்பட்டாலும், உலக டெஸ்ட் சம்பியன்ஷிப் தொடரின் இறுதிப் போட்டிக்கு தென்  ஆபிரிக்கா மற்றும் அவுஸ்திரேலிய அணிகள் ஏற்கனவே தகுதிபெற்றுவிட்டன என உறுதிப்படுத்தப்பட்டுள்ளது.

இத்தொடரின் முதலாவது போட்டி இன்று (29) ஆரம்பமாகவுள்ளதுடன், இரண்டாவது போட்டி எதிர்வரும் பெப்ரவரி 6 ஆம் திகதியன்று இதே மைதானத்தில் நடைபெறும்.

இலங்கை  அணி 2 டெஸ்ட்  போட்டிகளையும் வெல்வதுடன், அவுஸ்திரேலிய அணி தண்ட குறைப்பு புள்ளிகளை பெற்றால் புள்ளிகள் பட்டியலில் அவுஸ்திரேலியாவின் புள்ளிகள் வெகுவாக குறையும் சாத்தியம் ஏற்படக்கூடும் எனவும்  சில தரப்பினர் குறிப்பிட்டுள்ளனர்.

எவ்வாறாயினும்,  உலக டெஸ்ட் சம்பியன்ஷிப் புள்ளிப் பட்டியலில் தற்போது 5 ஆவது இடத்திலுள்ள இலங்கை அணி இபபோட்டித் தொடரை கைப்பற்றிக்கொள்ளும் பட்சத்தில் புள்ளிப்பட்டியில் முன்னேற இடமுண்டு.

இந்த இரண்டு போட்டிகளிலும் வெற்றி பெறுவது இலங்கை அணிக்கு மிகவும் முக்கியமானது, மேலும் இந்த இரண்டு போட்டிகளிலும் இலங்கை அணி வெற்றி பெற்றால், உலக டெஸ்ட் சம்பியன்ஷிப் 2023/2025 இல் மூன்றாவது இடத்தை கைப்பற்ற முடியும். அவ்வாறு,  இலங்கை அணி மூன்றாவது இடத்தைப் பிடித்தால், இலங்கை அணிக்கு நான்கு லட்சத்து ஐம்பதாயிரம் டொலர்கள் பணப்பரிசை வென்றெடுக்கும்.

இதற்கு முன்னர் இலங்கைக்கு 7 தடவைகள் சுற்றுப்பயணம் மேற்கொண்டுள்ள அவுஸ்திரேலிய கிரிக்‍கெட் அணி, 4 தொடர்களில் வெற்றியை ஈட்டியுள்ளது. இதில் 2 தொடர்களில் தோல்வியைத் தழுவியுள்ளதுடன், ஒரு தொடர் சமநிலையில் முடிவடைந்துள்ளது.

2011 ஆம் ஆண்டுக்குப் பிறகு அவுஸ்திரேலியா, இலங்கையில் ஒரு டெஸ்ட் தொடரை கூட வெல்லவில்லை. ஒரே ஒரு போட்டியில் மாத்திரமே வென்றுள்ளது.