தமிழ் திரையுலகின் ஒப்பற்ற குணச்சித்திர நடிகரான ராதா ரவி கதையின் நாயகனாக நடித்திருக்கும் புதிய திரைப்படமான ‘கடைசி தோட்டா’ எனும் திரைப்படத்தின் ஃபர்ஸ்ட் லுக் வெளியிடப்பட்டிருக்கிறது.
இயக்குநர் நவீன் குமார் இயக்கத்தில் தயாராகி இருக்கும் திரைப்படம் ‘கடைசி தோட்டா’. இதில் ‘டத்தோ’ ராதா ரவி, ஸ்ரீ குமார், வனிதா விஜயகுமார் உள்ளிட்ட பலர் நடித்திருக்கிறார்கள்.
மோகன் குமார் ஒளிப்பதிவு செய்திருக்கும் இந்த திரைப்படத்திற்கு வி. ஆர். சுவாமிநாதன் ராஜேஷ் இசையமைத்திருக்கிறார். யதார்த்த வாழ்வியலை மையப்படுத்தி தயாராகி இருக்கும் இந்த திரைப்படத்தை ஆர் வி ஆர் ஸ்டுடியோஸ் எனும் பட நிறுவனம் தயாரித்திருக்கிறது.
இதனிடையே நடிகர் ராதாரவியின் குடும்பத்தினருக்கும், தோட்டா என்ற பெயருக்கும் தொடர்பு இருப்பதாலும், படத்தின் பெயர் ‘கடைசி தோட்டா’ என்றிருப்பதாலும், ராதாரவி முதன்மையான கதாபாத்திரத்தில் நடிப்பதாலும், படத்தின் டேக் லைனில் ஒவ்வொரு தோட்டாவிற்கும் பின்னும் ஒரு கதை இருக்கிறது என குறிப்பிடப்பட்டிருப்பதாலும் இந்த திரைப்படத்திற்கு ரசிகர்களிடையே பெரும் எதிர்பார்ப்பை ஏற்படுத்தி இருக்கிறது என்பது குறிப்பிடத்தக்கது.
