லிந்துலை – பாமஸ்டன் தோட்டத்தில் மின்சாரம் தாக்கி ஆசிரியர் பலி

லிந்துலை பொலிஸ் பிரிவுக்குட்பட்ட பாமஸ்டன் தோட்டத்தில் மின்சாரம் தாக்கப்பட்டு ஒருவர் உயிரிழந்துள்ளார்.

இந்த சம்பவம் இன்று செவ்வாய்க்கிழமை (16) காலை 8:30 மணி அளவில் இடம்பெற்றுள்ளது.

உயிரிழந்தவர் பாமஸ்டன் தோட்டத்தில் வசிக்கும் பாமஸ்டன் தமிழ் வித்தியாலயத்தில் ஆசிரியாக கடமையாற்றும் 2 பிள்ளைகளின் தந்தையாவார்.

இவரது வீட்டு தோட்டத்தில் நீர் பாய்ச்சுவதற்காக மின்சார மோட்டர் பொருத்தப்பட்டிருந்த நிலையில் அதனை பார்வையிட சென்ற குறித்த ஆசியரியர் மின் மோட்டரின் கம்பியில் பாய்ந்த மின்சாரம் தாக்கியதில் சம்பவ இடத்திலேயே உயிரிழந்துள்ளதாக பிரதேச மக்கள் தெரிவிக்கின்றனர்.

இவரது சடலம் பிரேத பரிசோதனைகளுக்காக லிந்துலை பிரதேச வைத்தியசாலைக்கு கொண்டு செல்லப்பட்டுள்ளது.

இந்த சம்பவம் தொடர்பான விசாரணைகளை லிந்துலை பொலிஸார் மேற்கொண்டு வருகின்றனர்.