தமிழ் சினிமாவில் சமீப காலங்களில் ஒரு படத்தை விளம்பரப்படுத்தி ரசிகர்களை கவர்வதற்குப் பதிலாக, வேண்டுமென்றே சர்ச்சையை ஏற்படுத்தி அதன் மூலம் ரசிகர்களைக் கவர முயற்சித்து வருகிறார்கள்.
இரண்டு வாரங்களுக்கு முன்பு ஓவியா நடித்துள்ள ’90 எம்எல்’ பட டிரைலரில் ஆபாசமான வசனங்கள், காட்சிகளை வைத்து பரபரப்பை ஏற்படுத்தி சர்ச்சையை உருவாக்கினார்கள். அதனால், படத்திற்கு செலவில்லாத விளம்பரம் கிடைத்து, படத்தின் வியாபாரமும் அமோகமாக நடந்தது.
அந்த வரிசையில் நேற்று வெளியான ‘சூப்பர் டீலக்ஸ்’ பட டிரைலரில் சொல்லவே முடியாத ஒரு மோசமான கெட்ட வார்த்தை இடம் பெற வைத்து பரபரப்பை ஏற்படுத்தியுள்ளார்கள். யு டியுபில் இடம் பெறும் வீடியோக்கள், டிரைலர்கள், டீசர்கள் ஆகியவற்றிற்கு சென்சார் கிடையாது. அதனால், பலரும் இப்படியான ஒரு குறுக்கு வழியைக் கையாள்கிறார்கள் என்ற விமர்சனம் எழுந்துள்ளது.
இந்த மாதிரியான டிரைலர்கள் வரும் படங்கள் ‘ஏ’ சான்றிதழ் பெறும் படங்களாகத்தான் இருக்கின்றன. அந்தப் படங்களை 18 வயதுக்குக் கீழ் உள்ளவர்கள் தியேட்டரில் பார்க்க அனுமதியில்லை. அந்தப் படங்களின் டிரைலர்களுக்கு யு டியூபில் சென்சார் இல்லாததால் அதை வீட்டில் உள்ள சிறுவர், சிறுமியர் மொபைல் போன்கள் மூலம் பார்க்க வாய்ப்புள்ளது.
எனவே, யு டியூபில் வெளியிடப்படும் டிரைலர்களை சென்சார் பெற்ற பிறகே வெளியிட வேண்டும் என பலரிடம் இருந்து கோரிக்கை வலுத்து வருகிறது. தணிக்கை வாரியமும், மத்திய அரசும் இதற்கு சரியான நடவடிக்கை எடுக்க வேண்டும் என்ற எதிர்பார்ப்பு பொதுமக்களிடம் எழுந்துள்ளது.