பக்கா சென்னை பொண்ணு மேகா ஆகாஷ். தெலுங்கில் அறிமுகமாகி ஒரு பக்க கதை படத்தின் மூலம் தமிழுக்கு வந்தார். சமீபத்தில் அவர் நடித்த பேட்ட படம் வெளியானது. இன்று(பிப்.,1) அவர் நடித்துள்ள வந்தா ராஜாவாதான் வருவேன் படம் வெளிவந்திருக்கிறது.
இது தவிர மேகா நடித்து முடித்துள்ள, எனை நோக்கி பாயும் தோட்டா, ஒரு பக்க கதை, பூமராங் படங்கள் வெளிவர இருக்கிறது. இது தவிர இன்னும் 2 படங்களில் நடிக்க ஒப்பந்தமாகி இருக்கிறார். இந்த ஆண்டின் இறுதியில் மேகா ஆகாஷ் நடித்த 7 படங்கள் வெளிவந்திருக்கும். அனேகமாக 2019ம் ஆண்டில் அதிக படங்களில் நடித்த நடிகை என்ற பெயர் மேகா ஆகாஷூக்கு கிடைக்க வாய்ப்பிருக்கிறது.
இதுகுறித்து அவர் கூறியதாவது: எந்த தீமைக்குள்ளும் ஒரு நன்மை உண்டு என்று சொல்வார்கள். எனது சில படங்கள் தாமதமாகி இந்த ஆண்டு வெளிவருவதால் எனது அதிக படங்கள் வெளிவருகிறது. எனது ஒரு பக்க கதை படத்தை பார்த்து விட்டுதான் கார்த்திக் சுப்பராஜ் பேட்ட படத்தில் நடிக்க அழைத்தார். சிறிய கேரக்டர் தான் என்றாலும் ரஜினி படம் என்பதால் ஒத்துக் கொண்டேன். சிம்ரன், த்ரிஷா சிறிய கேரக்டரில் நடிக்கும்போது நான் நடித்தால் என்ன தப்பு. என்னோட சில படங்கள் வெளிவராமல் இருப்பது குறித்து சிறிது வருத்தம் இருந்தாலும் பேட்ட படத்தின் வெற்றி அந்த வருத்தத்தை மறைத்து என்னை அடுத்த கட்டத்திற்கு நகர்த்தியிருக்கிறது என்கிறார் மேகா ஆகாஷ்.
