சவூதி அரேபியாவில் மரண தண்டனை விதிக்கப்பட்ட இலங்கையரான அனோஜன் சிவராசவை விடுதலை செய்வதற்குத் தேவையான அரச தலையீட்டைக் கோரி, ராமன்ன மகா நிகாயம் மற்றும் அமரபுர மகா நிகாயத்தைச் சேர்ந்த மகாநாயக்க தேரர்கள் ஜனாதிபதி அனுர குமார திசாநாயக்கவிடம் ஒரு மனுவைச் சமர்ப்பித்துள்ளனர்.
ஸ்ரீலங்கா ராமன்ன மகா நிகாயத்தின் மகாநாயக்க தேரர் அதி வணக்கத்துக்குரிய மகுல்வே விமலபுத்தி தேரர் மற்றும் அமரபுர மகா நிகாய மகாநாயக்க தேரர் வணக்கத்துக்குரிய கரகொட உயங்கொட மைத்திரிமூர்த்தி தேரர் ஆகியோர் இணைந்து இந்த மகஜரை வெளியிட்டதாக ஜனாதிபதி ஊடகப் பிரிவு தெரிவித்துள்ளது.
குறித்த மகஜர் செப்டெம்பர் 30ஆம் திகதி ஜனாதிபதி செயலகத்தில் ஜனாதிபதியின் சிரேஷ்ட மேலதிக செயலாளர் ரொஷான் கமகேவிடம், தென் இலங்கை பிரதம சங்கநாயக்கர் வணக்கத்திற்குரிய ஓமல்பே சோபித தேரரால் கையளிக்கப்பட்டுள்ளது.
இலங்கை இந்து கலாசார பேரவை
இதேவேளை, அனோஜன் சிவராசாவின் விடயத்தில் தலையீடு செய்யுமாறு கோரி இந்து சமூகத்தின் சார்பிலும் தனியான மகஜர் ஒன்று கையளிக்கப்பட்டுள்ளது.
இந்து குருமார் சங்கம் மற்றும் அகில இலங்கை இந்து கலாசார பேரவை சார்பில் அதன் தலைவர் டொக்டர் சிவஸ்ரீ கே.வி.கே. வைத்தீஸ்வர குருக்கள் இந்த மகஜரை கையளித்துள்ளார்.
சவூதி அரேபியாவில் மரண தண்டனையை எதிர்கொண்டுள்ள அனோஜன் சிவராசாவை விடுவிப்பதற்கான நடவடிக்கைகளை முன்னெடுக்குமாறு இரு மகஜர்களிலும் அரசாங்கத்திடம் கோரிக்கை விடுக்கப்பட்டுள்ளது.
