நகைச்சுவை நடிகரும் கதையின் நாயகனுமான ஆர். ஜே. பாலாஜி முதன்மையான வேடத்தில் நடித்திருக்கும் ‘ரன் பேபி ரன்’ படத்தின் மைய திரைக்கதை தொடர்பான பிரத்யேக காணொளி வெளியிடப்பட்டிருக்கிறது.
டீசர் என்ற பெயரிலும் இல்லாமல், ட்ரைலர் என்ற பெயரிலும் இல்லாமல், தீம் என்ற பெயரில் இந்த காணொளி வெளியிடப்பட்டிருக்கிறது.
அறிமுக இயக்குநர் ஜியென் கிருஷ்ணகுமார் இயக்கத்தில் தயாராகி இருக்கும் முதல் திரைப்படம் ‘ரன் பேபி ரன்’. இதில் ஆர். ஜே. பாலாஜி கதையின் நாயகனாக நடிக்க, அவருக்கு ஜோடியாக நடிகை ஐஸ்வர்யா ராஜேஷ் நடித்திருக்கிறார்.
இவர்களுடன் விவேக் பிரசன்னா, இயக்குநர் தமிழ், பக்ஸ் என்ற பகவதி பெருமாள், ஸ்மிருதி வெங்கட், ஹரிஷ் பராடி, ஜோ மல்லூரி, நாகி நீடு, ராதிகா சரத்குமார், ஜோர்ஜ் மரியான் உள்ளிட்ட பலர் நடித்திருக்கிறார்கள். எஸ் யுவா ஒளிப்பதிவு செய்திருக்கும் இந்த திரைப்படத்திற்கு சாம் சி. எஸ். இசையமைத்திருக்கிறார். திரில்லர் ஜேனரில் தயாராகி இருக்கும் இந்த திரைப்படத்தை பிரின்ஸ் பிக்சர்ஸ் எனும் நிறுவனம் சார்பில் தயாரிப்பாளர் எஸ். லக்ஷ்மன் குமார் தயாரித்திருக்கிறார்.
இந்த திரைப்படத்தின் படப்பிடிப்பு முழுமையாக நிறைவடைந்து இறுதி கட்டப் பணிகள் விறுவிறுப்பாக நடைபெற்று வருகிறது. ஏற்கனவே இப்படத்தின் ஃபர்ஸ்ட் லுக் வெளியாகி இருந்த நிலையில், தற்போது தீம் காணொளி வெளியிடப்பட்டிருக்கிறது. இதில் படத்தில் இடம்பெறும் கதாபாத்திரங்களும், சம்பவங்களும், கதைக்களமும் இடம் பெற்றிருப்பதால் ரசிகர்களை உற்சாகப்படுத்தி இருக்கிறது.
