பங்களாதேஷ், மிர்பூர் உள்ளக அரங்கில் நடைபெற்றுவரும் மத்திய ஆசிய சவால் கிண்ண கரப்பந்தாட்டப் போட்டியில் மகளிர் பிரிவில் இலங்கை அணி 3 ஆம், 4ஆம் இடங்களைத் தீர்மானிக்கும் நிரல்படுத்தல் போட்டியில் விளையாடவுள்ளது.
இந்த சுற்றுப் போட்டியின் ஆரம்பப் போட்டியில் முற்றிலும் எதிர்பாராதவிதமாக நேபாளத்திடம் 2 – 3 என்ற செட்கள் அடிப்படையில் தோல்வி அடைந்த இலங்கை, அடுத்த 3 போட்டிகளில் கிர்கிஸ்தான், மாலைதீவுகள், பங்களாதேஷ் ஆகியவற்றை தலா 3 நேர் செட்களில் வெற்றிகொண்டிருந்தது.
எனினும் இன்று முற்பகல் நடைபெற்ற கடைசிப் போட்டியில் உஸ்பெகிஸ்தானிடம் 2 – 3 என்ற செட்கள் அடிப்படையில் தோல்வி அடைந்ததால் இறுதிப் போட்டியில் விளையாடும் வாய்ப்பை இலங்கை இழந்தது.
உஸ்பெகிஸ்தானுடனான இன்றைய போட்டியில் முதலாவது செட்டில் கடும் சவாலை எதிர்கொண்ட இலங்கை, சமநிலை முறிப்பு முறையில் 26 – 24 என்ற புள்ளிகள் கணக்கில் வெற்றிபெற்றது.
2ஆவது செட்டில் திறமையை வெளிப்படுத்திய இலங்கை 25 – 18 என்ற புள்ளிகள் கணக்கில் வெற்றிபெற்று 2 – 0 என்ற செட்கள் கணக்கில் முன்னிலையில் இருந்தது.
ஆனால், அடுத்த 3 செட்களிலும் ஏகப்பட்ட தவறுகளை இழைத்ததால் இலங்கை தொல்வியைத் தழுவியது.
3ஆவது செட்டில் கடும் சவால் விடுத்து விளையாடிய இலங்கைக்கு வெற்றிபெறக்கூடிய வாய்ப்பு இருந்தபோதிலும் தவறுகள் இழைத்ததால் 20 – 25 என்ற புள்ளிகள் கணக்கில் தோல்வி அடைந்தது.
தொடர்ந்து 4ஆவது செட்டில் நுட்பத்திறனுடன் விளையாடிய உஸ்பெகிஸ்தான் 25 – 19 என்ற புள்ளிகள் கணக்கில் வெற்றிபெற்று செட்கள் நிலையை 2 – 2 என சமப்படுத்தியது.
தீர்மானமிக்க கடைசி செட்டில் இரண்டு அணிகளும் சம அளவில் மோதிக்கொண்டபோதிலும் கடைசிக் கட்டத்தில் இலங்கை அணியின் தடுமாற்றத்தை நன்கு பயன்படுத்திக்கொண்ட உஸ்பெகிஸ்தான் 15 – 12 என்ற புள்ளிகள் கணக்கில் வெற்றிபெற்று இறுதிப் போட்டியில் விளையாட தகுதிபெற்றது.
ஆண்கள் பிரிவில் பங்குபற்றும் இலங்கை தனது முதல் 3 போட்டிகளில் உஸ்பெகிஸ்தான், நேபாளம், பங்களாதேஷ் ஆகிய அணிகளை வெற்றிகொண்டு நாளைய இறுதிப் போட்டியில் விளையாட தகுதிபெற்றது.
இலங்கை தனது கடைசி லீக் போட்டியில் மாலைதீவுகளை இன்று மாலை எதிர்த்தாடவுள்ளது.
