புதுமுக நடிகை அஞ்சலி சிவராமன் முதன்மையான கதாபாத்திரத்தில் நடித்திருக்கும் ‘பேட் கேர்ள்’ எனும் திரைப்படத்தின் டீசர் வெளியிடப்பட்டிருக்கிறது.
முன்னணி நட்சத்திர இயக்குநரான வெற்றிமாறன் தயாரித்திருக்கும் இந்த திரைப்படம் இம்மாத இறுதியில் ரொட்டர்டாம் சர்வதேச திரைப்பட விழாவில் திரையிடப்படுவதற்காக தெரிவு செய்யப்பட்டிருக்கிறது.
அறிமுக இயக்குநர் வர்ஷா பரத் இயக்கத்தில் உருவாகி வரும் ‘பேட் கேர்ள் ‘ எனும் திரைப்படத்தில் அஞ்சலி சிவராமன், சாந்தி பிரியா, ஹிர்து ஹாரூன், டீஜே அருணாச்சலம் , சஷாங்க், சரண்யா ரவிச்சந்திரன் உள்ளிட்ட பலர் நடித்திருக்கிறார்கள்.
ப்ரீதா ஜெயராமன் – ஜெகதீஷ் ரவி- பிரின்ஸ் ஆண்டர்சன் – ஆகியோர் இணைந்து ஒளிப்பதிவு செய்திருக்கும் இந்த திரைப்படத்திற்கு அமித் திரிவேதி இசையமைத்திருக்கிறார்.
வளரிளம் பெண்ணின் பாலியல் எண்ணத்திற்கு முக்கியத்துவம் கொடுத்து உருவாகி இருக்கும் இந்த திரைப்படத்தை கிராஸ் ரூட் பிலிம் கம்பனி புரொடக்ஷன் நிறுவனம் சார்பில் வெற்றிமாறன் தயாரித்திருக்கிறார் இதனை பொலிவுட் நடிகரும், இயக்குநருமான அனுராக் காஷ்யப் வழங்குகிறார்.
அனைத்து பணிகளும் நிறைவடைந்து சர்வதேச திரைப்பட விழாக்களில் திரையிட தயாராகி இருக்கும் இந்த திரைப்படத்தின் டீசர் வெளியீட்டு விழா சென்னையில் நடைபெற்றது.
இந்த டீசரில் தான் அழகற்றவளாக உணரும் வளரிளம் பருவத்தை சார்ந்த ஒரு பெண்- திருமணத்திற்கு முன் பாலியல் தொடர்பான விடயங்களில் தீவிர ஆர்வம் காட்டுகிறார்.
இது தொடர்பான காட்சிகள் இடம் பிடித்திருப்பதால் ஒரு தரப்பு ரசிகர்களின் எதிர்ப்பையும், மறு தரப்பு ரசிகர்களின் ஆதரவையும் ஒருங்கே இந்த இந்த டீசர் பெற்று வருகிறது.
