‘இயக்குநர் இமயம்’ பாரதிராஜா சிறப்பு தோற்றத்தில் நடிக்கும் ‘மார்கழி திங்கள்’ எனும் திரைப்படத்தின் செகண்ட் லுக் வெளியிடப்பட்டிருக்கிறது.
இதனை நட்சத்திர இயக்குநரான ஏ. ஆர். முருகதாஸ் அவருடைய சமூக வலைதள பக்கத்தில் வெளியிட்டார்.
நடிகரான மனோஜ் கே. பாரதி இயக்குநராக அறிமுகமாகும் திரைப்படம் ‘மார்கழி திங்கள்’. இதில் இயக்குநர் இமயம் பாரதிராஜா, சம்யுக்தா விஸ்வநாதன், வினோத் கிஷன், ஷ்யாம் செல்வன், ரக்ஷனா உள்ளிட்ட பலர் நடித்திருக்கிறார்கள். ஏ. ஆர். சூர்யா ஒளிப்பதிவு செய்து வரும் இந்த திரைப்படத்திற்கு இசைஞானி இளையராஜா இசையமைக்கிறார்.
கிராமத்து பின்னணியிலான எளிய மனிதர்களின் யதார்த்த வாழ்வியலை மையப்படுத்தி தயாராகும் இந்த திரைப்படத்தை வெண்ணிலா புரொடக்ஷன்ஸ் எனும் பட நிறுவனம் சார்பில் இயக்குநர் சுசீந்திரன் தயாரிக்கிறார்.
இப்படத்தின் படப்பிடிப்பு நிறைவடைந்து இறுதி கட்டப் பணிகள் விறுவிறுப்பாக நடைபெற்று வருகிறது. தற்போது இளையராஜா இப்படத்திற்கு பின்னணி இசையமைத்து வருகிறார். சிறிய இடைவெளிக்குப் பிறகு பாரதிராஜாவும் இளையராஜாவும் இப்படத்தில் இணைந்திருப்பதால் பெரும் எதிர்பார்ப்பை ஏற்படுத்தி இருக்கிறது.
