தெலுங்கின் முன்னணி நட்சத்திர நடிகர்களில் ஒருவரான நடிகர் நானி கதையின் நாயகனாக முதன்மையான வேடத்தில் நடித்திருக்கும் ‘ஹாய் நான்னா’ எனும் திரைப்படத்தின் டீசர் வெளியிடப்பட்டிருக்கிறது.
இயக்குநர் ஷௌர்யுவ் இயக்கத்தில் தயாராகி இருக்கும் புதிய திரைப்படம் ‘ஹாய் நான்னா’. இதில் ‘நேச்சுரல் ஸ்டார்’ நானி, ‘சீதாராமம்’ புகழ் நடிகை மிருணாள் தாக்கூர், குழந்தை நட்சத்திரம் கியாரா கண்ணா உள்ளிட்ட பலர் நடித்திருக்கிறார்கள். ஷானு ஜோன் வர்கீஸ் ஒளிப்பதிவு செய்திருக்கும் இந்த திரைப்படத்திற்கு ஹேஷாம் அப்துல் வஹாப் இசையமைத்திருக்கிறார்.
தந்தை -மகள் இடையேயான உறவை மையப்படுத்தி முழு நீள குடும்ப பொழுதுபோக்கு திரைப்படமாக தயாராகி இருக்கும் இந்த திரைப்படத்தை வைரா என்டர்டெய்ன்மென்ட் எனும் பட நிறுவனம் சார்பில் தயாரிப்பாளர்கள் மோகன் செருகூரி மற்றும் டொக்டர் விஜேந்தர் ரெட்டி தீகலா ஆகியோர் இணைந்து தயாரித்திருக்கிறார்கள்.
இப்படத்தின் படப்பிடிப்பு நிறைவடைந்து இறுதி கட்ட பணிகள் விறுவிறுப்பாக நடைபெற்று வருகிறது. மேலும் இத்திரைப்படத்தில் இடம் பெற்ற பாடல்கள் வெளியாகி பெரும் வரவேற்பை பெற்ற நிலையில், தற்போது இப்படத்தின் டீசர் வெளியிடப்பட்டிருக்கிறது. டீசரில் தந்தை- மகள் இடையேயான உணர்வுபூர்வமான உறவு குறித்த காட்சிகள் இடம்பெற்றிருப்பதால் ரசிகர்களிடம் பெரும் எதிர்பார்ப்பை ஏற்படுத்தி இருக்கிறது.
