தளபதி விஜய் நடிப்பில் தயாராகி இருக்கும் ‘லியோ’ படத்திலிருந்து ‘அன்பெனும் ஆயுதம் தானே..’ எனத் தொடங்கும் மூன்றாவது பாடல் வெளியிடப்பட்டிருக்கிறது. இந்த பாடலுடன் பாடலுக்கான லிரிக்கல் வீடியோவும் வெளியாகி இருக்கிறது.
இயக்குநர் லோகேஷ் கனகராஜ் இயக்கத்தில் தயாராகி இருக்கும் புதிய திரைப்படம் ‘லியோ’. இதில் விஜய், திரிஷா, பொலிவுட் நடிகர் சஞ்சய் தத், கௌதம் வாசுதேவ் மேனன், மிஷ்கின், மன்சூர் அலிகான், பிரியா ஆனந்த் உள்ளிட்ட பலர் நடித்திருக்கிறார்கள்.
மனோஜ் பரஹம்சா ஒளிப்பதிவு செய்திருக்கும் இந்த திரைப்படத்திற்கு அனிருத் இசையமைத்திருக்கிறார். எக்சன் என்டர்டெய்னராக தயாராகி இருக்கும் இந்த திரைப்படத்தை செவன் ஸ்கிரீன் ஸ்டுடியோ பட நிறுவனம் சார்பில் தயாரிப்பாளர் எஸ். எஸ். லலித்குமார் தயாரித்திருக்கிறார். ஜெகதீஷ் பழனிசாமி இணை தயாரிப்பாளராக பணியாற்றி இருக்கிறார்.
இம்மாதம் 19 ஆம் திகதியன்று உலகம் முழுவதும் பட மாளிகையில் வெளியாகவிருக்கும் இத்திரைப்படத்தில் இடம்பெற்ற ‘அன்பெனும் ஆயுதம் தானே..’ எனத் தொடங்கும் மூன்றாவது பாடல் வெளியிடப்பட்டிருக்கிறது.
பாடலாசிரியர் விஷ்ணு எடவன் எழுதியிருக்கும் இந்த பாடலை இசையமைப்பாளரும், பாடகருமான அனிருத், பாடகி லோதிகாவுடன் இணைந்து பாடியிருக்கிறார். இந்தப் பாடல் மெல்லிசையாகவும், காதல் உணர்வை வெளிப்படுத்துவதாகவும் இருப்பதால் இளம் தலைமுறை ரசிகர்களிடத்தில் பெரும் வரவேற்பை பெற்றிருக்கிறது.
