இயக்குநர் இமயம் பாரதிராஜா, நட்டி என்கிற நட்ராஜ், ரியோ ராஜ், சாண்டி மாஸ்டர் ஆகிய முன்னணி நட்சத்திர நடிகர்கள் முதன் முறையாக இணைந்து நடித்திருக்கும் ‘ நிறம் மாறும் உலகில் ‘ எனும் திரைப்படத்தின் படப்பிடிப்பு நிறைவடைந்திருப்பதாக படக் குழுவினர் பிரத்யேக காணொளியை வெளியிட்டு உற்சாகத்துடன் அறிவித்துள்ளனர்.
அறிமுக இயக்குநர் ஜெ. பி. பிரிட்டோ இயக்கத்தில் உருவாகி வரும் ‘ நிறம் மாறும் உலகில் ‘ எனும் திரைப்படத்தில் பாரதிராஜா, நட்டி என்கிற நட்ராஜ், ரியோ ராஜ், சாண்டி மாஸ்டர் , விஜி சந்திரசேகர், லவ்லின் சந்திரசேகர், நிவாஸ் ஆதித்தன், சல்மா, யோகி பாபு, சுரேஷ் மேனன், ‘ஆடுகளம்’ நரேன், மைம் கோபி , வடிவுக்கரசி , விக்னேஷ் காந்த், ரிஷிகாந்த், கனிகா, ஆதிரா, காவ்யா அறிவுமணி ,துளசி உள்ளிட்ட பலர் நடித்திருக்கிறார்கள்.
மல்லிகா அர்ஜுன், மணிகண்ட ராஜா ஆகியோர் இணைந்து ஒளிப்பதிவு செய்திருக்கும் இந்த திரைப்படத்திற்கு தேவ் பிரகாஷ் இசையமைத்திருக்கிறார். ஹைபர் லிங்க் பாணியிலான இந்த திரைப்படத்தை சிக்னேச்சர் புரொடக்ஷன்ஸ் மற்றும் ஜி எஸ் சினிமா இன்டர்நேஷனல் ஆகிய பட நிறுவனங்கள் இணைந்து தயாரித்திருக்கிறது.
மும்பை, வேளாங்கண்ணி, சென்னை, திருத்தணி, என நான்கு வெவ்வேறு கதை களங்கள், நான்கு விதமான கதை மாந்தர்கள், நான்கு வகையினதான வாழ்வியல், இதை இணைக்கும் ஒரு புள்ளி, என கதை சொல்லலில் தனித்துவத்துடன் இந்தப் படம் உருவாகி இருக்கிறது என மகிழ்ச்சியுடன் தெரிவிக்கும் படக்குழுவினர், இப்படத்தின் படப்பிடிப்பு முழுவதுமாக நிறைவடைந்திருக்கிறது என பிரத்யேக காணொளியையும் வெளியிட்டுள்ளனர். விரைவில் இப்படத்தின் முன்னோட்டம் வெளியாகும் என்று எதிர்பார்க்கப்படுகிறது.
