இதுவரை வெறும் காமெடியனாக மட்டுமே நடித்து வந்த யோகிபாபு, தற்போது சில படங்களில் முக்கியத்துவம் வாய்ந்த கதாபாத்திரங்களில் நடிக்கத் தொடங்கியுள்ளார். அந்த வகையில், தர்மபிரபு படத்தில் எமதர்மனாக நடிக்கிறார். அவருடன் கருணாகரன், ரமேஷ் திலக், அழகம் பெருமாள், ராதாரவி உள்பட பலர் நடித்துள்ள இந்த படத்தை முத்துக்குமரன் இயக்கியுள்ளார்.
இந்த படத்தின் டிரெய்லர் தற்போது வெளியாகியிருக்கிறது. அதில் எமனாக வரும் யோகிபாபு, பாவம் செய்தவர்களை சொர்க்கத்துக்கும், புண்ணியம் செய்தவர்களை நரகத்துக்கும் அனுப்பப்போகிறேன் என்கிறார். அதைக்கேட்டு பூலோகத்தில்தான் தகுதி இல்லாதவர்களுக்கு பதவி கொடுக்கிறார்கள் என்றால் எமலோகத்திலுமா? என்று ஒருவர் சொல்கிறார். அதையடுத்து, அம்மா போனால் சின்னம்மா, சின்னம்மா போனால் சின்னய்யா என்பது போன்ற அரசியலை அட்டாக் செய்யும் வசனம் ஒன்று இடம்பெற்றுள்ளது. ஆக, தர்மபிரபு தமிழக அரசியலை நேரடியாக அட்டாக் செய்திருப்பது இந்த டிரெய்லரிலேயே தெரிந்து விட்டது. இந்த படத்திற்கு யோகிபாபுதான் வசனம் எழுதியிருக்கிறார் என்பது குறிப்பிடத்தக்கது.
