கொரோனாத் தொற்றுக் காலகட்டத்தில் மக்களின் பொழுதுபோக்கிற்காக கைக்கொடுத்ததால் டிஜிட்டல் தளத்திற்கான ஆதரவு பெருகி வருகிறது. தங்களின் சந்தாதாரர்களையும், புதிய வாடிக்கையாளர்களையும் கவர்வதற்காக முன்னணி டிஜிட்டல் நிறுவனங்கள் புதிய படைப்புகளை தயாரித்து வெளியிட்டு வருகிறது. அந்த வகையில் அமேசான் ப்ரைம் டிஜிட்டல் தளம் விரைவில் நான்கு புதிய தமிழ் தொடர்களை வெளியிடுவதற்கான அதிகாரப்பூர்வ அறிவிப்பை வெளியிட்டிருக்கிறது.
சுழல், தி வில்லேஜ், வதந்தி, மாடர்ன் லவ் சென்னை என நான்கு தொடர்கள் மற்றும் திரைப்படங்கள் வெளியாகின்றன. இதில் மொடர்ன் லவ் சென்னை என்ற படத்தில் மாநகரத்தின் தனித்துவமான சூழலில் வாழும் ஆறு வெவ்வேறு நபர்களைப் பற்றிய காதலை ஆராய்கிறது. ஆரண்யகாண்டம், சூப்பர் டீலக்ஸ் ஆகிய படங்களை இயக்கிய இயக்குநர் தியாகராஜன் குமாரராஜா தெரிவு செய்த இந்த படைப்புகளை இயக்குநர்கள் பாலாஜி தரணீதரன்,ராஜு முருகன், ப்ரதீப் குமார் மற்றும் தியாகராஜன் குமாரராஜா ஆகியோர் எழுதியிருக்கிறார்கள்.
நடிகர்கள் கிஷோர், அசோக் செல்வன், நடிகைகள் ரம்யா நம்பீசன், ரிது வர்மா, விஜயலட்சுமி, சம்யுக்தா விஸ்வநாதன் உள்ளிட்ட பலர் நடித்திருக்கிறார்கள். இதனை பாரதிராஜா, பாலாஜி சக்திவேல், ராஜுமுருகன், கிருஷ்ணகுமார் ரமா குமார், அக்சய் சுந்தர் ஆகியோர் இயக்கி இருக்கிறார்கள்.
இதனை அடுத்து ‘சுழல்’ என்ற பெயரில் ‘விக்ரம் வேதா’ புகழ் இயக்குநர் புஷ்கர் & காயத்ரி தயாரித்திருக்கும் படைப்பு வெளியாகிறது. ஒரு சிறிய நகரம் ஒன்றில் காணாமல் போகும் ஒரு எளிய மனிதனைக் கண்டுபிடிப்பதற்காக மேற்கொள்ளப்படும் பயணத்தை மையமாகக் கொண்ட இந்த திரைப்படத்தை இயக்குநர்கள் பிரம்மா மற்றும் அனுசரண் இயக்கி இருக்கிறார்கள். இதில் கதையின் நாயகியாக ஐஸ்வர்யா ராஜேஷ் நடிக்க, அவர்களுடன் கதிர், ஆர். பார்த்திபன், ஸ்ரேயா ரெட்டி உள்ளிட்ட பலர் நடித்திருக்கிறார்கள்.
இதனை அடுத்து ‘ஸ்வீட் காரம் கோப்பி’ என்ற பெயரில் மூன்று தலைமுறையைச் சேர்ந்த பெண்கள் தங்களின் அனுபவத்தை சாலை பயணத்தின் ஊடே பகிர்ந்துகொள்கிறார்கள். இதுபோன்ற வித்தியாசமான நிகழ்ச்சியில் மூத்த நடிகைகள் லட்சுமி, மது, சாந்தி பாலச்சந்திரன் ஆகியோர் நடித்திருக்கிறார்கள். இதனை பிஜோய் நம்பியார், கிருஷ்ண மாரிமுத்து, சுவாதி ரகுராமன் ஆகியோர் இயக்கி இருக்கிறார்கள்.
இதைத் தொடர்ந்து ‘தி வில்லேஜ்’ என்ற இந்தியாவில் முதன்முறையாக கிராபிக்ஸ் நாவலை மையப்படுத்தி உருவாக்கப்பட்டிருக்கும் படைப்பு வெளியாகிறது. வித்தியாசமான இந்த முயற்சியை ‘அவள்’, ‘நெற்றிக்கண்’ ஆகிய படங்களை இயக்கிய இயக்குநர் மிலிந்த் ராவ் இயக்குகிறார். இதில் நடிகர் ஆர்யா, நடிகை திவ்யா பிள்ளை, ஆடுகளம் நரேன், தலைவாசல் விஜய், முத்துக்குமார், கலைராணி, ஜார்ஜ் மரியான், ஜான் கொக்கேன், அர்ஜுன் சிதம்பரம், பூஜா ராமச்சந்திரன், ஜெயப்பிரகாஷ் உள்ளிட்ட பலர் நடித்திருக்கிறார்கள்.
இந்த நான்கு தொடர்களும் அமேசான் பிரைம் வீடியோவில் பிரத்யேகமாக வெளியாக இருப்பதால் புதிய வாடிக்கையாளர்களின் எண்ணிக்கை அதிகரிக்கக்கூடும் என டிஜிட்டல் தள வணிகர்கள் தெரிவிக்கிறார்கள்.
#No 1 TamilWebSite 
| http://Facebook page / easy 24 news | Easy24News – யூடியூப் YouTube | [email protected]
