கரீபியன் பிரீமியர் லீக் தொடரில் நேற்று கடைசி இரண்டு லீக் போட்டிகள் நடைபெற்றது.

இதில் முதல் போட்டியில் டு பிளிசிஸ் தலைமையிலான செயின்ட் கிட்ஸ் அண்டு நேவிஸ் பேட்ரியாட்ஸ் அணியும், பிராவோ தலைமையிலான ட்ரின்பாகோ நைட் ரைடர்ஸ் அணியும் மோதின.

இந்தப் போட்டியில் முதலில் துடுப்பெடுத்தாடிய செயின்ட் கிட்ஸ் அண்டு நேவிஸ் பேட்ரியாட்ஸ் அணி 20 ஓவர்கள் முடிவில் 6 விக்கெட் இழப்பிற்கு 137 ஓட்டங்கள் சேர்த்தது.

சிம்மன்ஸ் ஆட்டமிழக்காமல் 40 பந்தில் 60 ஓட்டங்கள் (3 பவுண்டரி, 4 சிக்சர்) எடுத்தார். ட்ரின்பாகோ நைட் ரைடர்ஸ் அணியின் தலைவர் பிராவோ 4 ஓவர்கள் வீசி 13 ஓட்டங்கள் மட்டுமே விட்டுக்கொடுத்து 4 விக்கெட்டுக்கள் வீழ்த்தி அசத்தினார்.

பின்னர் 138 ஓட்டங்கள் எடுத்தால் வெற்றி என்ற இலக்குடன் களமிறங்கிய ட்ரின்பாகோ நைட் ரைடர்ஸ் அணிக்கு தொடக்க வீரர் ஆம்லா (6) சொதப்பினார். மற்றொரு தொடக்க வீரரான பெர்கின்ஸ் 29 ஓட்டங்களில் ஆட்டமிழந்தார்.

அதன்பின் வந்த ராம்தின், பிரெண்டன் மெக்கல்லம் அணியை வெற்றியை நோக்கி அழைத்துச் சென்றனர்.

இவர்களது சிறப்பான ஆட்டத்தால் ட்ரின்பாகோ நைட் ரைடர்ஸ் அணி 17 ஓவர்களிலே 2 விக்கெட் இழப்பிற்கு 138 ஓட்டங்கள் சேர்த்து 8 விக்கெட் வித்தியாசத்தில் அபார வெற்றி பெற்றது. ராம்தின் (52), மெக்கல்லம் (43) களத்தில் இருந்தனர்.

இதைத் தொடர்ந்து நடந்த மற்றொரு ஆட்டத்தில் கெய்ல் தலைமையிலான ஜமைக்கா தல்லாவாஸ் அணியும், டேரன் சமியின் தலைமையிலான செயின்ட் லூசியா சௌக்ஸ் அணியும் மோதின.

நாணய சுழற்சியில் வென்ற ஜமைக்கா தல்லாவாஸ் அணி களத்தடுப்பை தெரிவு செய்தது. இதனால் செயின்ட் லூசியா சௌக்ஸ் அணி முதலில் துடுப்பெடுத்தாடியது.

தொடக்க வீரர்களான பிளெட்சர், சார்லஸ்ஆகியோர் அதிரடியாக ஆடினர். சார்லஸ் 35 பந்தில் 64 ஓட்டங்களும், பிளெட்சர் 54 பந்தில் 70 ஓட்டங்களும் சேர்த்தனர்.

அதன்பின் வந்த வாட்சன் 17 பந்தில் 5 சிக்சர்களுடன் 42 ஓட்டங்கள் குவிக்க, செயின்ட் லூசியா சௌக்ஸ் 20 ஓவர்கள் முடிவில் 3 விக்கெட் இழப்பிற்கு 194 ஓட்டங்கள் குவித்தது.

195 ஓட்டங்கள் எடுத்தால் வெற்றி என்ற இலக்குடன் களமிறங்கிய ஜமைக்கா தல்லாவாஸ் அணிக்கு அனைத்து வீரர்களும் சொதப்பினர்.

இதனால் அந்த அணியால் 20 ஓவர்கள் முடிவில் 6 விக்கெட் இழப்பிற்கு 177 ஓட்டங்கள் மட்டுமே எடுக்க முடிந்தது. இதனால் செயின்ட் சௌக்ஸ் அணி 17 ஓட்டங்கள் வித்தியாசத்தில் வெற்றி பெற்றது.

ஒட்டுமொத்த கரீபியன் பிரீமியர் லீக் தொடரின் லீக் ஆட்டங்கள் நேற்றுடன் முடிவடைந்தன.

எதிர்வரும் 3ம் திகதி நடைபெறும் பிளே-ஆஃப் சுற்றின் முதல் போட்டியில் கயானா அமேசான் வாரியர்ஸ்- ஜமைக்கா தல்லாவாஸ் அணியும் மோதுகின்றன.

அதேபோல் எதிர்வரும் 4ம் திகதி நடைபெறும் 2வது பிளே-ஆஃப் சுற்றில் செயின்ட் லூசியா சௌக்ஸ்- ட்ரின்பாகோ நைட் ரைடர்ஸ் அணியும் பலப்பரீட்சை நடத்துகின்றன.