மேற்கிந்திய தீவுகள் அணிக்கு எதிரான முதல் டெஸ்டில் அசத்திய அஸ்வின் ஐசிசி டெஸ்ட் பவுலர் தரவரிசைப் பட்டியலில் மீண்டும் முதலிடம் பிடித்து அசத்தியுள்ளார்.

மேற்கிந்திய தீவுகளுக்கு எதிராக ஆடிய முதல் டெஸ்ட் போட்டியில் இந்தியா 92 ஓட்டங்கள் வித்தியாசத்தில் வெற்றி பெற்றது.

இந்த ஆட்டத்தில் சிறப்பாக செயல்பட்ட சுழற்பந்து வீச்சாளர் அஸ்வின் இந்திய அணியின் வெற்றிக்கு முக்கிய காரணமானார்.

முதல் இன்னிங்சில் துடுப்பாட்டத்தில் 113 ஓட்டங்களை விளாசியது மட்டுமல்லாமல், 2வது இன்னிங்சில் பந்துவீச்சில் 83 ஓட்டங்களை விட்டுக் கொடுத்து 7 விக்கெட்டுகள் அள்ளினார்.

இதனால் இன்று வெளியான டெஸ்ட் தர வரிசை பட்டியலில், ஏற்கனவே முதலிடத்தில் இருந்த பாகிஸ்தான் சுழற்பந்துவீச்சாளர் யாசிர் ஷாவை பின்னுக்கு தள்ளி அஸ்வின் (876 புள்ளிகள்) மீண்டும் முதலிடம் பிடித்துள்ளார்.

2015ம் ஆண்டு இறுதியில் அஸ்வின் ஐசிசி டெஸ்ட் பவுலர்கள் தர வரிசையில் முதலிடம் பிடித்திருந்தார். இதன்பிறகு முதல் பத்து இடங்களுக்குள் இருந்த அஸ்வின் தற்போது மீண்டும் முதலிடம் பிடித்துள்ளார்.

இங்கிலாந்துக்கு எதிரான முதல் டெஸ்டில் அசத்தி முதலிடம் பிடித்த பாகிஸ்தான் சுழற்பந்துவீச்சாளர் யாசிர் ஷா 2வது டெஸ்டில் சொதப்பியதால் 5வது இடத்துக்கு தள்ளப்பட்டுள்ளார்.

ஜேம்ஸ் ஆன்டர்சன், ஸ்டூவர்ட் பிராட், டேல் ஸ்டெய்ன் ஆகியோர் 2 முதல் 4 இடங்களில் உள்ளனர்.

அதேபோல் ரவீந்திர ஜடேஜா, டிரென்ட் பவுல்ட், ஜோஷ் ஹஸ்சில்வுட், மோர்னே மோர்க்கல், வெர்னன் பிளான்டர் ஆகியோர் முறையே 6 முதல் 10 இடங்களில் உள்ளனர்.