சென்னையில் பன்னீர் செல்வம் அணிக்கு பலம் சேர்க்கும் பணியில் ஈடுபட்ட நபர் மீது சசிகலா ஆதரவாளர்கள் கொலைவெறி தாக்குதல் நடத்தியுள்ளனர்.

பிரபாகரன் என்பவர் பன்னீர் செல்வம் அணிக்கு பலம் சேர்க்கும் வகையில் அதிமுக நிர்வாகிகளிடம் ஆதரவு கடிதம் வாங்கும் வேலையில் ஈடுபட்டு வருகிறார்.

இந்நிலையில், நேற்று இரவு திண்டிவனத்தில் உள்ள ஹொட்டல் அருகே பிரபாகரன் நின்றுகொண்டிருந்தபோது, அங்கு, இரண்டு வாகனங்களில் வந்த ஒரு கும்பல், ‘ஓ.பி.எஸ்., அணிக்கு ஆதரவு திரட்டுகிறாயா…’ என கேட்டு,இரும்பு கம்பியால் பிரபாகரனை சரமாரியாகத் தாக்கியது. இதில், மண்டை உடைந்து, ரத்த வெள்ளத்தில் பிரபாகரன் மயங்கி விழுந்ததும் அந்த கும்பல் தப்பிச் சென்றது.

படுகாயமடைந்த பிரபாகரன், திண்டிவனம் அரசு மருத்துவமனையில் சேர்க்கப்பட்டார். அங்கு, பிரபாகரனின் தலையில், 21 தையல் போடப்பட்டு, மேல் சிகிச்சைக்கு, புதுச்சேரி ஜிப்மர் மருத்துவமனையின் அவரச சிகிச்சை பிரிவில் அனுமதிக்கப்பட்டுள்ளார்.