தமிழக அரசின் ஆலோசகர் பொறுப்பில் இருந்து ஷீலா பாலகிருஷ்ணன் தனது பதவியை ராஜினாமா செய்து இருப்பதாக தகவல்கள் வெளியாகியுள்ளது.

தமிழக அரசின் அலோசகராக இருந்த ஷீலா பாலகிருஷ்ணன் தனது பதவியிலிருந்து விலகியிருப்பதாக தகவல்கள் வெளியாகியுள்ளது. இவருக்கு மார்ச் 31-ம் திகதி வரை பதவிகாலம் உள்ள நிலையில் அவர் பதவி விலகியிருப்பது பல சந்தேகங்களை எழுப்பியுள்ளது.

தமிழகத்தில் 41-வது தலைமைச் செயலாளராக கேரளத்தை சேர்ந்த ஷீலா பாலகிருஷ்ணன் கடந்த 2012-ம் ஆண்டு டிசம்பர் 28-ம் திகதி நியமிக்கப்பட்டார். .அவரது பதவிக்காலம் 2014 மார்ச் 31-ம் திகதியுடன் முடிவடைந்தது. இதனையடுத்து அவர் பணி ஓய்வு பெற்றார்.

தமிழக அரசின் பல்வேறு திட்டங்கள் குறித்த விவரங்களை ஷீலா பாலகிருஷ்ணன் நன்கு அறிந்தவர் என்பதால் அவருக்கு தமிழக அரசின் ஆலோசகர் பதவியை அப்போதைய முதல்வராக இருந்த ஜெயலலிதா வழங்கினார்.

ஜெயலலிதா உடல்நலக்குறைவால் மருத்துவமனையில் அனுமதிக்கப்பட்டபோது தமிழக அரசின் முக்கிய அலுவல்களை இவரே கவனித்து வந்தார். மேலும் ஜெயலலிதாவின் மறைவுக்கு பின்னரும் முதல்வர் பன்னீர் செல்வத்துக்கு அவர் முக்கிய ஆலோசனை வழங்கிவந்தார்.

இந்தநிலையில் அவர் தீடீரென பதவி விலகியிருப்பது பல்வேறு கேள்விகளை எழுப்பியுள்ளது. தற்போதைய அதிமுக பொதுச்செயலாளரான சசிகலாவுடன் கருத்து வேறுபாடு காரணமாக ஷீலா பதவி விலகியிருக்கலாம் எனவும் சந்தேகம் எழுந்துள்ளது. இவர் 1976-ம் ஆண்டில் ஐஏஎஸ் பணியில் சேர்ந்தவராவார்.