ஐக்கிய நாடுகள் மன்றத்தின் பொதுச் செயலர் பான் கி-மூனின் பதவி இந்த ஆண்டு இறுதியில் முடிவுக்கு வருகிறது. அடுத்த ஐ.நா., பொதுச்செயலரை தெரிவு செய்ய ஐக்கிய நாடுகள் மன்றத்தின் வரலாற்றில் முதன் முறையாக விவாதம், நேர்காணல் உள்ளிட்ட தேர்வு முறைகள் பின்பற்றப்படுகின்றன.

இதில் போர்த்துகல் முன்னாள் பிரதமரும், ஐக்கிய நாடுகள் மன்றத்தின் அகதிகள் நல ஆணையத்தின் தலைவராகவும் இருந்த அன்டோனியோ குட்டெரெஸ், ஐ.நா., பொதுச் செயலர் பதவிக்கு போட்டியிடுகிறார்.

கடந்த மூன்று சுற்றுகளிலும் முன்னிலை வகித்த அவர், 4வது சுற்றிலும் அதிக வாக்குகளைப் பெற்று முன்னிலையில் உள்ளார்.

15 உறுப்பு நாடுகள் கொண்ட ஐக்கிய நாடுகள் மன்றத்தின் பாதுகாப்புக் குழுவில் 4ம் சுற்று தேர்வில், குட்டெரசுக்கு ஆதரவாக 12 நாடுகளும், எதிராக 2 நாடுகளும் வாக்களித்துள்ளன. ஒரு நாடு கருத்து எதுவும் தெரிவிக்கவில்லை என கூறப்படுகிறது.