உலகிலேயே மிக விலை மதிப்பு மிக்க வண்ணம் தீட்டும் புத்தகம் பெஸ்புக். ஒரு புத்தகத்தின் விலை 19.77 லட்சம் ரூபாய். இதில் 10 ஓவியங்கள் இடம்பெற்றுள்ளன.
இயான் பெக் என்ற ஓவியர் பிரத்யேகமாக இந்த ஓவியங்களை வரைந்திருக்கிறார். பெரியவர்களுக்கான இந்த வண்ணம் தீட்டும் புத்தகம் கடந்த சில ஆண்டுகளாக மிகவும் பிரபலமாகி வருகிறது. இயந்திரத்தனமான வாழ்க்கையில் மன அழுத்தத்துக்கு உள்ளாகிவிடுகிறார்கள்.
இவர்களை மன அழுத்தத்திலிருந்து எளிதில் விடுபட வைக்கின்றன வண்ணம் தீட்டும் புத்தகங்கள். ‘‘வண்ணம் தீட்டும் புத்தகங்கள் ஆயிரக்கணக்கில் கிடைக்கின்றன. ஆனால் எங்கள் நிறுவனம் பணக்காரர்களுக்குத் தேவையான பொருட்களை மட்டுமே உற்பத்தி செய்யக்கூடியது. பணக்காரர்களுக்கு வண்ணம் தீட்டும் புத்தகங்கள் இல்லை என்பதை அறிந்து, அதைக் கொண்டு வந்திருக்கிறோம்.
ஒருவரின் குணநலன்கள், குடும்பம், பிடிக்கும் விஷயங்கள் போன்றவற்றை அறிந்து, அதற்கேற்றவாறு இந்த ஓவியங்களை வரைந்து கொடுக்கிறோம். ஒருவர் வாங்கும் புத்தகம்போல் இன்னொருவரின் புத்தகம் இருக்காது.
உலகின் மிக முக்கியமான ஓவியர்களில் ஒருவரான இயான் பெக் வரைந்த ஓவியங்கள், சிறப்புத் தாள்கள், நேர்த்தியான தோல் அட்டை, தங்கத்தால் அச்சடிக்கப்பட்ட எழுத்துகள் என்று எல்லாவற்றையும் சிறப்பாகச் செய்திருக்கிறோம்” என்கிறார் பெஸ்புக் நிறுவனர்.
