அமேஸோன் (Amazon) இணையத்தளமானது பங்குச்சந்தையில் அடைந்த அதீத வளர்ச்சியும், இதன் மூலம் கிடைத்த வருமானமும் அதன் தலைவரை உலகின் மூன்றாவது பணக்காரர் என்ற இடத்திற்கு உயர்த்தியுள்ளது.

உலகின் மூன்றாவது பெரும் பணக்காரர் என்ற அந்தஸ்தை தற்போது அமேஸோன் நிறுவனத்தின் தலைவர் ஜெஃப் பெஜோஸ் (Jeff Bezos) பெற்றிருக்கிறார்.

மேலும் அவரின் சொத்துமதிப்பு 65.3 பில்லியன் டொலர் என வெளிநாட்டு பத்திரிகை ஒன்று செய்தி வெளியிட்டுள்ளது.

அதுமட்டுமல்லாது பல ஆய்வாளர்களின் கணிப்பையும் மீறி, அமேஸோன் நிறுவனத்தின் வருமானம் பல மடங்கு உயர்ந்துள்ளதாக தகவல்கள் தெரிவிக்கின்றன.

குறிப்பாக 2015இல் 92 மில்லியன் டொலராக இருந்த அமேஸோன் நிறுவனத்தின் இலாபம் இந்த ஆண்டு 857 மில்லியன் டொலராக அதிகரித்துள்ளது.

மேலும் பணக்காரர்கள் பட்டியலில் முதலிடத்தில், மைக்ரோஸாப்ட் நிறுவனத் தலைவர் பில்கேட்ஸ் (78 பில்லியன் டொலர்), காணப்படுவதோடு அவரைத் தொடர்ந்து அடுத்த இடத்தில் ஜாரா நிறுவனர் அமான்சியோ ஓர்டிகா (73.1 பில்லியன் டொலர்) காணப்படுகின்றமை குறிப்பிடத்தக்கது.