இயக்குனர் இராஜமோகன் இயக்கத்தில் நடிகர் அதர்வா நடிப்பில் சமீபத்தில் வெளியான ‘அட்ரஸ்’ திரைப்படத்தின் டீசர் திரையுலகத்தினரிடமும், ரசிகர்களிடத்திலும் பெரும் பாராட்டுக்களை குவித்து வருகிறது.
அந்த வகையில் இப்படத்தின் டீஸரை பார்த்த கன்னட சூப்பர் ஸ்டார் சிவராஜ்குமார் அவர்கள் பெரும் ஆச்சர்யத்துடன் இயக்குநரை பாரட்டியதோடு, தனது சமூக வலைத்தள பக்கத்தில் இப்படத்தின் டீஸரை பகிர்ந்ததோடு, படத்தை பாராட்டி வீடியோ பதிவும் வெளியிட்டுள்ளார்.
இது குறித்து இயக்குநர் இராஜமோகன் பேசுகையில்,‘நான் இயக்குநரும், ஒளிப்பதிவாளருமான விஜய் மில்டன் அவர்களிடம் பல காலமாக உதவியாளராக பணியாற்றியிருக்கிறேன்.
திரையுலகில் அவர் தான் என் குரு. இயக்குநராக மாறிய பின்னரும் அவர் அழைக்கும் போது அவர் படங்களில் பணியாற்றுவேன்.
விஜய் மில்டன் சார் இப்போது கன்னட சுப்பர்ஸ்டார் சிவராஜ்குமார் அவர்களை வைத்து, படம் இயக்கி கொண்டிருக்கிறார். அதில் நானும் வேலை பார்த்தேன்.
எனக்கு சிவராஜ்குமார் அவர்களை முன்பிருந்தே தெரியும். அவர் என்னை குறித்து விசாரித்த போது, என் படத்தின் டீஸரை காட்டினேன்.
ஆச்சரியப்பட்டு படத்தை குறித்து அனைத்து விசயங்களையும் கேட்டு தெரிந்து கொண்டார். என்னைப் பாராட்டியதுடன் படப்பிடிப்பு தளத்தில் அனைவரிடத்திலும் இந்த படம் குறித்து பேசினார்.
அத்துடன் மட்டுமல்லாமல் டீசரை கேட்டு வாங்கி அவரது சமூக வலைத்தள பக்கத்தில் பகிர்ந்தார். மேலும் படத்தையும் படக்குழுவினரையும் பாராட்டி ஒரு வீடியோ பதிவு செய்து,‘ இதை வெளியிடுங்கள்’ என்றும் கேட்டுக்கொண்டார்.
மிக உச்சத்தில் இருக்கும் நடிகர், எங்கள் படத்தை இந்தளவு பாராட்டியது ,மிகப்பெரும் மகிழ்ச்சியையும், உற்சாகத்தையும் தந்துள்ளது.
‘அட்ரஸ்’ படத்தின் டீஸருக்கு ரசிகர்களிடமிருந்தும் பாரட்டுக்கள் குவிந்து வருகிறது. இப்படம் கண்டிப்பாக அனைவரது எதிர்பார்ப்பையும் பூர்த்தி செய்யும் ஜனரஞ்சகமான படைப்பாக இருக்கும் என்றார்.
இந்த படத்தில் அதர்வாவுடன் இசக்கி பரத், நடிகை பூஜா ஜாவேரி, தியா, தம்பி ராமையா உள்ளிட்ட பலர் நடித்திருககிறார்கள்.
அஜய் கிருஷ்ணா தயாரித்திருக்கும் இந்த படத்திற்கு கிரிஷ் கோபாலகிருஷ்ணன் இசையமைத்திருக்கிறார்.
