நிறைவேற்று ஜனாதிபதி முறையை ஒழிப்பதற்காக அரசாங்கத்திற்கு வழங்கப்பட்ட ஆணையைப் பயன்படுத்த வேண்டும் என்று கொழும்பு மாவட்ட நாடாளுமன்ற உறுப்பினர் முஜிபுர் ரஹ்மான் நாடாளுமன்றத்தில் தெரிவித்தார்.
நேற்றையதினம் நாடாளுமன்றில், 22வது திருத்தம் அறிமுகப்படுத்தப்பட்டது. நீதித்துறையைப் பாதிக்கும் வயது வரம்பு உயர்வு குறித்து இந்த நாட்டில் சில விவாதங்கள் நடந்துள்ளன. அரசியலமைப்புச் சட்டத் திருத்தங்கள் சில காலமாக வந்துகொண்டிருக்கின்றன.
22வது திருத்தத்தின் மூலம் நீதித்துறையின் சுதந்திரத்திற்கு சவால்
கடந்த காலத்தில், நீங்கள் ஆட்சிக்குக் கொண்டுவரப் பாடுபட்ட கட்சிகளும், அரசியல் தலைவர்களும், நிபுணர்களும் இந்தத் திருத்தத்திற்கு எதிராகத் தங்கள் கருத்துக்களைத் தெரிவித்து வந்துள்ளனர்.
22வது திருத்தத்தின் மூலம் நீதித்துறையின் சுதந்திரத்திற்கு சவால் விடப்படுவதால், அரசாங்கத்தை ஆட்சிக்குக் கொண்டுவரப் பாடுபட்டவர்களும் இதை எதிர்த்துள்ளனர்.
ஜே.ஆரின் அரசியலமைப்பு சட்டத்துடன் ஜே.வி.பிக்கு நீண்ட வரலாறு
ஜனாதிபதி ஜே.ஆர். ஜெயவர்தன கொண்டுவந்த இந்த அரசியலமைப்புச் சட்டத்துடன் உங்களுக்கு நீண்டகால வரலாறு உண்டு. நீங்கள் எப்போதும் இந்த அரசியலமைப்புச் சட்டத்தை ஒரு சர்வாதிகார அரசியலமைப்புச் சட்டம் என்று கூறி வந்துள்ளீர்கள்.
இந்த அரசியலமைப்புச் சட்டத்தைக் கிழித்தெறியக் கோரி ஆர்ப்பாட்டங்கள் நடைபெற்றன. அரசியலமைப்புச் சட்டத்தால் ஜனநாயகம் சுருங்கிவிட்டது என்று நீங்கள் தொடர்ந்து மக்களிடம் கூறி வந்தீர்கள்.
பெயரளவிலான ஜனாதிபதியையும் நிறைவேற்று பிரதமரையும் உள்ளடக்கிய ஒரு புதிய அரசியலமைப்புச் சட்டத்தைக் கொண்டு வருவதாக நீங்கள் வாக்குறுதி அளித்தீர்கள். உங்கள் வாக்குறுதிகளின் காரணமாகவே மக்கள் உங்களுக்கு ஆணை வழங்கினர்,” என்று நாடாளுமன்ற உறுப்பினர் மேலும் கூறினார்
