நடிப்புக்காக தேசிய விருது பெற்ற நடிகர் பொபி சிம்ஹா கதையின் நாயகனாக நடித்திருக்கும் ‘வசந்த முல்லை’ எனும் திரைப்படத்தின் வெளியீட்டுத் திகதி அதிகாரபூர்வமாக அறிவிக்கப்பட்டிருக்கிறது.
இயக்குநர் ரமணன் புருஷோத்தமா இயக்கத்தில் தயாராகும் புதிய திரைப்படம் ‘வசந்த முல்லை’. இதில் சிம்ஹா கதாநாயகனாக நடிக்க, அவருக்கு ஜோடியாக நடிகை கஷ்மிரா பர்தேசி நடித்திருக்கிறார். கோபி அமர்நாத் ஒளிப்பதிவு செய்திருக்கும் இந்த திரைப்படத்துக்கு ராஜேஷ் முருகேசன் இசையமைத்திருக்கிறார்.
அக்ஷன், என்டர்டெய்னராக தயாராகியிருக்கும் இந்த திரைப்படத்தை ராம் தல்லூரி புரொடக்ஷன் மற்றும் முத்ராஸ் ஃபிலிம் ஃபெக்டரி ஆகிய நிறுவனங்களின் சார்பில் ரஜனி தல்லூரி மற்றும் ரேஷ்மி சிம்ஹா ஆகியோர் இணைந்து தயாரித்திருக்கிறார்கள்.
இப்படத்தின் படப்பிடிப்பு நிறைவடைந்து இறுதிக்கட்ட பணிகள் விறுவிறுப்பாக நடைபெற்று வருகிறது. இப்படத்தின் ஃபர்ஸ்ட் லுக், மோஷன் போஸ்டர் ஆகியவை வெளியாகி பெரும் வரவேற்பை பெற்ற நிலையில் தற்போது இப்படத்தின் வெளியீட்டுத் திகதி அதிகாரபூர்வமாக அறிவிக்கப்பட்டிருக்கிறது. அந்த வகையில் இந்த திரைப்படம் பெப்ரவரி மாதம் 10ஆம் திகதி உலகம் முழுவதும் படமாளிகையில் வெளியாகும் என அறிவிக்கப்பட்டிருக்கிறது.
இந்த திரைப்படம் தமிழில் மட்டுமல்லாமல் தெலுங்கு மற்றும் கன்னட மொழிகளிலும் வெளியாகிறது.சிறந்த நடிகரான சிம்ஹா சொந்தமாக தயாரித்து, கதாநாயகனாக நடித்திருப்பதால், இந்த படத்தின் வெற்றி அவருடைய திரையுலக வாழ்க்கையில் திருப்புமுனையை ஏற்படுத்துமா என்பதை காத்திருந்து பார்ப்போம்.
