‘குக் வித் கோமாளி’ என்ற நிகழ்ச்சியின் மூலம் பிரபலமான நடிகர் அஸ்வின் கதாநாயகனாக அறிமுகமாகும் படத்திற்கு ‘என்ன சொல்லப் போகிறாய்?’ என பெயரிடப்பட்டிருக்கிறது.
அறிமுக இயக்குனர் ஹரிஹரன் இயக்கத்தில் தயாராகும் புதிய திரைப்படம் ‘என்ன சொல்ல போகிறாய்?’. இந்தப்படத்தில்,’குக் வித் கோமாளி’ நிகழ்ச்சியின் மூலமாக பிரபலமான அஸ்வின் கதையின் நாயகனாக நடிக்கிறார்.
இப்படத்தில் அவருடன் ‘குக் வித் கோமாளி’ என்ற நிகழ்ச்சியின் மூலம் பிரபலமான நடிகர் புகழ் நடிக்கிறார். ரிச்சர்ட் எம் நாதன் ஒளிப்பதிவு செய்யும் இந்தப் படத்திற்கு, விவேக்-மெர்வின் இசை அமைக்கிறார்கள். இந்தப் படத்தை டிரைடன்ட் ஆர்ட்ஸ் சார்பில் பிரபல தயாரிப்பாளர் ரவீந்திரன் தயாரிக்கிறார்.
இப்படத்தைப் பற்றி இயக்குனர் பேசுகையில்,’ காதல் காமெடி கலந்து தயாராகும் இத்திரைப்படத்தில் அஸ்வினுக்கு ஜோடியாக இரண்டு முன்னணி நடிகைகள் நடிக்க உள்ளனர். இது தொடர்பாக அவர்களிடம் பேச்சுவார்த்தை நடைபெற்று வருகிறது. இப்படத்தின் படப்பிடிப்பு ஜூலை 19 ஆம் திகதியன்று சென்னையில் தொடங்குகிறது’ என்றார்.
‘குட்டி பட்டாஸ்’ என்ற வீடியோ இசை அல்பம் மூலம் மில்லியன் கணக்கிலான பார்வையாளர்களை கவர்ந்திருக்கும் அஸ்வின் நடித்துள்ள இப்படத்தின் டைட்டில் லுக் போஸ்டர் வெளியிடப்பட்டிருக்கிறது. இதனை அஸ்வினின் இரசிகர்கள் இணையத்தில் வைரலாக்கி வருகிறார்கள்.
