இலங்கையில் இடம்பெற்றதாகக் கூறப்படும் வலிந்து காணாமல் ஆக்கப்பட்ட சம்பவங்கள் தொடர்பில், வலிந்து காணாமல் ஆக்கப்பட்டோர் தொடர்பான ஐக்கிய நாடுகள் பணிக்குழுவின் (WGEID) உறுப்பினர்களுடன் ஜெனீவாவில் முக்கிய கலந்துரையாடல் இடம்பெற்றுள்ளது.
வலிந்து காணாமல் ஆக்கப்பட்டோர் தொடர்பான அமர்வுகளும், ஐக்கிய நாடுகள் மனித உரிமைகள் பேரவையின் 63ஆவது கூட்டத்தொடரும் இடம்பெற்று வரும் நிலையில் இந்த உயர்மட்ட சந்திப்பு நடைபெற்றுள்ளது.
இந்தக் கலந்துரையாடலில் வலிந்து காணாமல் ஆக்கப்பட்டோர் தொடர்பான ஐக்கிய நாடுகள் பணிக்குழுவின் தலைவரும் அறிக்கையாளருமான Grazyna Baranowska, பணிக்குழுவின் உறுப்பினர்கள் மற்றும் ஐக்கிய நாடுகள் மனித உரிமைகள் ஆணையாளர் அலுவலகத்தின் (OHCHR) செயலகப் பிரதிநிதிகள் உள்ளிட்டோர் கலந்துகொண்டனர்.
இலங்கையில் இடம்பெற்ற வலிந்து காணாமல் ஆக்கப்பட்ட சம்பவங்கள் தொடர்பான ஒருங்கிணைப்பை வலுப்படுத்துதல் மற்றும் சர்வதேச மனித உரிமை பொறிமுறைகளுடனான தொடர்பை மேம்படுத்துதல் ஆகியவை கலந்துரையாடலின் முக்கிய விடயங்களாக அமைந்தன.
நீண்டகாலமாக தீர்வு காணப்படாமல் உள்ள வழக்குகளைக் கையாள்வதற்கான தொடர்ச்சியான சர்வதேச ஈடுபாட்டின் அவசியம் குறித்தும், பொருத்தமான சர்வதேச பொறிமுறைகளை ஆராய்வது தொடர்பிலும் கவனம் செலுத்தப்பட்டது.
உள்நாட்டு பொறிமுறைகளால் பாதிக்கப்பட்டவர்கள் மற்றும் காணாமல் ஆக்கப்பட்டோரின் குடும்பங்களுக்கு உண்மை, நீதி மற்றும் பொறுப்புக்கூறலை வழங்க முடியாத நிலைமை தொடர்பிலும் பிரதிநிதிகள் கவலை வெளியிட்டனர்.
வலிந்து காணாமல் ஆக்கப்பட்டோர் தொடர்பான அலுவலகத்தின் (OMP) செயற்பாடுகள் மற்றும் அதன் வரம்புகள் குறித்தும் கலந்துரையாடப்பட்டதுடன், பாதிக்கப்பட்டவர்களை மையமாகக் கொண்ட அர்த்தமுள்ள செயன்முறைகளின் அவசியமும் வலியுறுத்தப்பட்டது.
உலகில் வலிந்து காணாமல் ஆக்கப்பட்டோர் தொடர்பான பதிவுசெய்யப்பட்ட வழக்குகள் அதிகளவில் உள்ள நாடுகளில் இலங்கையும் ஒன்றாக இருப்பதால், இந்த விடயம் தொடர்பில் தொடர்ச்சியான சர்வதேச கவனம் அவசியமானது என தெரிவிக்கப்பட்டது.
மனித உரிமைகள் செயற்பாட்டாளர் லக்ஷ்மணன் சஞ்சீவ் கருத்து தெரிவிக்கையில், வலிந்து காணாமல் ஆக்கப்பட்டோர் தொடர்பான ஐக்கிய நாடுகள் பணிக்குழு உறுப்பினரும் நிபுணருமான Ana Lorena Delgadillo Pérez அண்மையில் இலங்கைக்கு மேற்கொண்ட விஜயம், பாதிக்கப்பட்டவர்கள் மற்றும் அவர்களது குடும்பங்களின் அனுபவங்களை பணிக்குழு ஆழமாகப் புரிந்துகொள்வதற்கான முக்கிய வாய்ப்பை வழங்கியதாக குறிப்பிட்டார்.
யாழ்ப்பாணத்தில் நடைபெற்ற “The Long Road to Justice” என்ற சர்வதேச மாநாட்டில் Delgadillo Pérez பங்கேற்றதுடன், இலங்கையின் பல பகுதிகளில் இடம்பெற்ற சந்திப்புகள் மற்றும் கல்விசார் நடவடிக்கைகள் மூலமாக, உள்நாட்டு பொறுப்புக்கூறல் பொறிமுறைகள் தொடர்பான நீண்டகால பிரச்சினைகள் மற்றும் பாதிக்கப்பட்டவர்களை உண்மையாக மையப்படுத்திய அணுகுமுறையின் அவசியம் தொடர்பில் புரிதலைப் பெற்றதாகவும் அவர் தெரிவித்தார்.
உள்ளூர் செய்திகள்
“காணாமல் ஆக்கப்பட்டோரின் குடும்பங்கள் பல ஆண்டுகளாக நீதிக்கான பதில்களைத் தேடி வருகின்றனர். அவர்களின் அமைதியான போராட்டங்களும், உண்மை மற்றும் நீதிக்கான தொடர்ச்சியான கோரிக்கைகளும், தமது அன்புக்குரியவர்களின் நிலை மற்றும் இருப்பிடம் குறித்து அறிந்துகொள்வதற்கான அவர்களின் நீண்டகால போராட்டத்தின் ஆழத்தையும் தொடர்ச்சியையும் வெளிப்படுத்துகின்றன” என சஞ்சீவ் தெரிவித்தார்.
பாதிக்கப்பட்டவர்கள் மற்றும் அவர்களின் பிரதிநிதிகள் ஐ.நா. ஒப்பந்த அமைப்புகள், விசேட நடைமுறைகள் மற்றும் ஏனைய சர்வதேச மனித உரிமை பொறிமுறைகளுடன் நேரடியாக தொடர்புகொள்வதற்கான வாய்ப்புகளை உறுதி செய்வது முக்கியமானது என்றும் அவர் வலியுறுத்தினார்.
பாதிக்கப்பட்டவர்கள் மற்றும் சர்வதேச பொறிமுறைகளுக்கு இடையிலான நேரடி தொடர்பை வலுப்படுத்துவது, தனிப்பட்ட வழக்குகளின் ஆவணப்படுத்தல், அவற்றின் தொடர்ச்சியான கண்காணிப்பு மற்றும் தீர்வு காணப்படாத வலிந்து காணாமல் ஆக்கப்பட்டோரின் வழக்குகள் தொடர்பான சர்வதேச ஒருங்கிணைப்பு ஆகியவற்றை மேம்படுத்த உதவும் எனவும் அவர் குறிப்பிட்டார்.
ஜெனீவாவில் இடம்பெற்ற இந்தச் சந்திப்பு, வலிந்து காணாமல் ஆக்கப்பட்டோர் தொடர்பான ஐக்கிய நாடுகள் பணிக்குழு மற்றும் ஏனைய சர்வதேச மனித உரிமை பொறிமுறைகளுடனான ஒத்துழைப்பை வலுப்படுத்துவதற்கான முக்கிய நடவடிக்கையாக அமைந்துள்ளதாக பிரதிநிதிகள் தெரிவித்தனர்.
அத்துடன், வலிந்து காணாமல் ஆக்கப்பட்ட சம்பவங்கள் தொடர்பில் உண்மை, நீதி மற்றும் பொறுப்புக்கூறலை நிலைநாட்டுவதற்கு தொடர்ச்சியான சர்வதேச ஈடுபாடு, நம்பகமான பொறிமுறைகள் மற்றும் பாதிக்கப்பட்டவர்கள் மற்றும் அவர்களது குடும்பங்களின் அர்த்தமுள்ள பங்கேற்பு அவசியம் என்றும் அவர்கள் வலியுறுத்தினர்.
