சிவா இயக்கத்தில், இமான் இசையமைப்பில், அஜித், நயன்தாரா மற்றும் பலர் நடிக்க தமிழில் கடந்த ஜனவரி மாதம் 10ம் தேதி வெளிவந்த படம் ‘விஸ்வாசம்’. ரஜினிகாந்த் நடித்து வெளிவந்த ‘பேட்ட’ படத்திற்குப் போட்டியாக வெளிவந்தாலும் வசூலில் முதலிடத்தைப் பிடித்தது ‘விஸ்வாசம்’. அஜித் நடித்து வெளிவந்த படங்களிலேயே இந்தப் படத்திற்குத்தான் அதிகமான வசூல் என்று கோலிவுட்டில் கூறினார்கள்.
இந்தப் படம் தெலுங்கில் அதே பெயரில் டப்பிங் செய்யப்பட்டு மார்ச் 1ம் தேதியன்று வெளியானது. ‘ஜகமல்லா’ என்ற பெயரில் கன்னடத்தில் டப்பிங் செய்யப்பட்டு மார்ச் 7ம் தேதியன்று வெளியானது. ஆனால், தமிழில் சாதனை வெற்றியைப் புரிந்த இந்தப் படம் தெலுங்கு, கன்னடத்தில் தோல்வியைச் சந்தித்தது.
தமிழில் முன்னணி ஹீரோக்களாக உள்ளவர்களில் மற்றவர்களைப் போல அஜித்தால் தெலுங்கில் ஒரு குறிப்பிடத்தக்க வெற்றியை இதுவரை பெற முடியவில்லை. ‘விஸ்வாசம்’ படமாவது அந்த வெற்றிக் கணக்கை ஆரம்பித்து வைக்கும் என்று அஜித் ரசிகர்கள் எதிர்பார்த்தார்கள், ஆனால் அது நடக்கவில்லை. அடுத்து அஜித் நடித்து வெளிவர உள்ள ‘நேர் கொண்ட பார்வை’ படமாவது தெலுங்கில் வெற்றிக் கணக்கை ஆரம்பிக்கட்டும்.
