காலம் மாறினாலும் பிரச்சினைகள் மட்டும் மாறாது என்பார்கள். அந்த மாதிரி இன்றைக்கும் கிராமங்களில் நடந்து கொண்டிருக்கும் பிரச்சினைகளை மையமாக வைத்து, பட்டுக்கோட்டையில் நடந்த ஒரு உண்மை சம்பவத்தின் அடிப்படையில் உருவாகி உள்ள படம் சீமத்துரை.
கீதன் ஹீரோவாகவும், வர்ஷா ஹீரோயினாகவும் நடித்துள்ளனர். முக்கியமான ரோலில் நடிகை விஜி சந்திரசேகர் நடித்துள்ளார்.ஜோஸ் ப்ராங்க்ளின் இசை, சந்தோஷ் தியாகராஜன் இயக்கி உள்ளார். புவன் மீடியா வொர்க்ஸ் சார்பில் சுஜய் கிருஷ்ணா தயாரித்துள்ளார்.
இப்படத்தின் பெரும்பகுதி தஞ்சாவூரை சுற்றி நடைபெற்றுள்ளது. ஆனால் இன்றைக்கு அந்த ஊர் அலங்கோலமாக கிடக்கின்றன. இதுப்பற்றி சந்தோஷ் தியாகராஜன் பேசும்போது, ‘தஞ்சாவூர் மாவட்டத்தில் பட்டுக்கோட்டையை சுற்றி தான் 45 நாட்கள் படப்பிடிப்பு நடத்தினோம். பட்டுக்கோட்டையை சுற்றி உயர்ந்து நின்ற தென்னை மரங்கள் படத்தில் முக்கியமாக பதிவு செய்தோம்.
ஆனால் அந்த தென்னை மரங்களை கஜா புயல் சுத்தமாக அழித்துவிட்டது. நாங்கள் அழகாக படம் பிடித்த பகுதிகள் இன்று அலங்கோலமாக கிடப்பதை பார்க்கும்போது படக்குழுவில் உள்ள அத்தனை பேருக்கும் வேதனை ஏற்பட்டுள்ளது. அந்த கிராமத்து மக்கள் எங்களை அவர்கள் குடும்பங்களில் ஒருவராக நடத்தினார்கள். அவர்கள் மீண்டு எழுந்து வருவார்கள் என்ற நம்பிக்கை இருக்கிறது என்றார்.
