புவனேஷ்வர் குமார்– நுாபுர் நாகர் திருமணம் வரும் 23ம் தேதி நடக்கவுள்ளது.
இந்திய கிரிக்கெட் அணியின் வேகப்பந்து வீச்சாளர் புவனேஷ்வர் குமார், 27. மொத்தம் 18 டெஸ்ட் (45 விக்.,), 78 ஒருநாள் (85 விக்.,), 23 ‘டுவென்டி–20’ (21 விக்.,) போட்டிகளில் பங்கேற்றுள்ளார். இவருக்கும், நீண்ட கால தோழி நுாபுர் நாகருக்கும், கடந்த மாதம் இந்த ஜோடிக்கு நிச்சயதார்த்தம் நடந்தது. இதனிடையே, வரும் 23ம் தேதி இவர்களுக்கு உ.பி.,யில் உள்ள மீரட் நகரில் திருமணம் நடக்கவுள்ளது.
அணியில் விடுவிப்பு: இதனிடையே, வரும் 16ம் தேதி துவங்கும் இலங்கை அணிக்கு எதிரான டெஸ்ட் தொடரில் பங்கேற்கும் இந்திய அணியில் புவனேஷ்னர் இடம் பெற்றுள்ளார். இருப்பினும், டெஸ்ட் அணியில் இவர் ‘ரெகுலர்’ பவுலர் இல்லை என்பதால், திருமணத்துக்காக, இந்திய கிரிக்கெட் போர்டு புவனேஷ்வரை அணியில் இருந்து விடுவிக்கும் என்று தெரிகிறது.
26ம் தேதி புவனேஷ்வரில் வரவேற்பு நிகழ்ச்சிக்கு நடக்கும். பின், நவ. 30ல் இந்திய கிரிக்கெட் வீரர்களுக்காக மட்டும் ‘ஸ்பெஷல்’ வரவேற்பு நிகழ்ச்சிக்கு ஏற்பாடு செய்யப்பட்டுள்ளது.
இதுகுறித்து புவனேஷ்வர் குமார் தந்தை கிரண் பால் சிங் கூறுகையில்,‘‘ மீரட்டில் நடக்கும் திருமணத்தில் நெருங்கிய உறவினர்கள், நண்பர்கள் மட்டும் பங்கேற்பர். இந்திய கிரிக்கெட் நட்சத்திரங்கள், நிர்வாகிகள் அனைவரும் பங்கேற்கும் வகையில் டில்லியில் 30ம் தேதி வரவேற்பு நடக்கிறது. ஏனெனில், மூன்றாவது டெஸ்ட் (டிச., 2–6) போட்டிக்காக அனைவரும் இங்கு இருப்பர்,’’ என்றார்.
