அட்லி இயக்கத்தில் விஜய், நடிக்கும் ‘மெர்சல்’ படம் வரும் தீபாவளியை முன்னிட்டு அக்டோபர் 18 ஆம் தேதி வெளியாகவிருக்கிறது. படப்பிடிப்பு முடிவடைந்து தற்போது போஸ்ட் புரொடக்ஷன் பணிகள் துரிதமாக நடைபெற்று வருகிறது.
சமீபத்தில் பிரம்மாண்டமான முறையில் இப்படத்தின் பாடல்கள் வெளியிடப்பட்டன. இது ஒருபுறமிருக்க இன்னொருபுறம் ‘மெர்சல்’ எமோஜி ஒன்றை ட்விட்டரில் அறிமுகம் செய்தனர். இது தென்னிந்தியாவிலேயே ஒரு படத்திற்காக செய்யப்படும் முதல் முயற்சி என்று அறிவித்தனர்.
அதேபோல், இப்போது ‘மெர்சல்’ படத்தலைப்பிற்கு ‘டிரேட் மார்க்’ சான்றிதழ் வாங்கியுள்ளனர். தென்னிந்திய அளவில் ஒரு படத்தின் தலைப்பிற்காக டிரேட் மார்க் வாங்கியிருப்பது இதுவே முதல்முறை.
படத்தின் தலைப்புக்கு ஏன் டிரேட் மார்க் வாங்க வேண்டும்? வணிக ரீதியாக பயன்படுத்தும் பொருட்களில் மெர்சல் என்ற பெயரை அச்சிட வேண்டும் என்றால் தேனாண்டாள் பிலிம்ஸ் நிறுவனத்துக்கு பணம் கொடுக்க வேண்டும். இதன் மூலம் லட்சக்கணக்கில் வருவாய் ஈட்ட வேண்டும் என்பதற்காகவே அவசர அவசரமாக டிரேட் மார்க் வாங்கியிருப்பதாக சொல்லப்படுகிறது.
