மீண்டும் அஜித் நடிக்கும் படத்தை இயக்கவுள்ளதை இயக்குநர் சிவா சூசகமாக வெளிப்படுத்தியுள்ளார்.
‘வீரம்’, ‘வேதாளம்’ மற்றும் ‘விவேகம்’ என 3 படங்களில் இணைந்து பணியாற்றியுள்ளது அஜித் – சிவா கூட்டணி. ‘விவேகம்’ படத்தை விளம்பரப்படுத்த சிவா அளித்த பேட்டியில் “மீண்டும் அஜித் சார் படம் பண்ணுவது குறித்து, அவருடைய தரப்பிலிருந்து தான் அறிவிப்பு வரும்” என்று படம் வெளியாகும் முன்பு தெரிவித்திருந்தார்.
தற்போது ‘விவேகம்’ வெளியான பிறகு அளித்துள்ள பேட்டியில், தனது அடுத்த படத்திலும் அஜித் நாயகனாக நடிக்கவுள்ளதை சூசகமாக உறுதிப்படுத்தியிருக்கிறார் சிவா. அவர் அளித்த பேட்டியில் கூறியிருப்பதாவது:
அடுத்த படத்திலும் அஜித் சாரை இயக்கும் எண்ணமுள்ளது. அவரிடம் படப்பிடிப்புக்கு இடைவெளியில் நிறைய கதைகள் கூறியுள்ளேன். அவருக்கு ஏற்றக் கதையைத் தேர்வு செய்தவுடன் படமாக்குவோம்.
எப்படி முந்தைய 3 படங்கள் வெவ்வேறு களத்திலிருந்ததோ, அதே போன்று அடுத்த படமும் வேறொரு களத்திலிருக்கும். அப்படி ஒன்று அமைந்தால் மகிழ்வேன். அது குறித்த அறிவிப்பு அஜித் சார் தரப்பிலிருந்து வந்தால் தான் நன்றாக இருக்கும். அதைப் பற்றி நான் சொல்லக் கூடாது.
இவ்வாறு சிவா தெரிவித்துள்ளார்.
