தனது பிறந்த நாளன்று அரசியல் கட்சி தொடர்பாக எந்த அறிவிப்பையும் அறிவிக்கப்போவதில்லை என நடிகர் கமல்ஹாசன் தெரிவித்துள்ளார்.
தமிழக அரசுக்கு எதிராகவும், ஊழலுக்கு எதிராகவும் நடிகர் கமல்ஹாசன் தொடர்ந்து கருத்து தெரிவித்து வருகிறார். மேலும், டெங்கு போன்ற மக்களை பாதிக்கும் பிரச்சனைகள் பற்றியும் அவர் பேசிவருகிறார்.
விரைவில் தான் அரசியல் கட்சி ஒன்றை தொடங்க இருப்பதாக கமல்ஹாசன் வெளிப்படையாக பேட்டியளித்தார்.
அதோடு, சில நாட்களுக்கு முன்பு தனது நற்பணி மன்ற நிர்வாகிகளுடன் அவர் ஆலோசனை நடத்தினார். அதன் முடிவில் அவரது பிறந்த நாளான நவம்பர் 7ம் தேதி முக்கிய அறிவிப்பை அவர் வெளியிடுவார் என நிர்வாகிகள் கூறியிருந்தனர்.
எனவே, அன்று அவர் தனது அரசியல் பிரவேசம் பற்றியே அறிவிப்பார் என அவரது ரசிகர்களும், நற்பணி மன்ற இயக்கத்தினரும் எதிர்பார்த்திருந்தனர்.
அநிலையில், தனது ஆதரவாளர்களை ஒன்றிணைப்பதற்கான ஒரு மொபைல் ஆப்-பை மட்டுமே அவர் நவம்பர் 7ம் தேதி வெளியிட இருக்கிறார் எனவும், அதற்கான ஏற்பாடுகள்தான் தீவிரமாக நடைபெற்று வருகிறது என இன்று காலை ஒரு செய்தி வெளியானது.
இந்நிலையில் கமல்ஹாசன் தனது டிவிட்டர் பக்கத்தில் “ ஊடக உந்தல் கருதி கட்சியை அறிவிக்க முடியாது. நவம்பர். 7 இயக்கத்தார் கூடுவது எம் பலவருட வழக்கம்.
பொது அறிவுப்புகள் மக்கள் மன்றத்திலேயே நடக்கும்” எனக் குறிப்பிட்டுள்ளார்.
இந்த செய்தி அவரின் ரசிகர்களுக்கும், நற்பணி மன்ற இயக்கத்தினருக்கும் ஏமாற்றத்தை ஏற்படுத்தியுள்ளது.
