ஒருநாள் போட்டி தரவரிசையில் கோலி முதலிடம் நீடிப்பு

ஐசிசி ஒருநாள் போட்டிகளுக்கான பேட்டிங் தரவரிசையில் இந்திய கேப்டன் விராட் கோலி தொடர்ந்து முதலிடத்தைத் தக்கவைத்துள்ளார். டேவிட் வார்னர் 2-ம் இடத்தில் உள்ளார்.

டாப் 15 இடங்களில் தோனி (12), தவண் (13), ரோஹித் சர்மா (14) ஆகியோர் உள்ளனர். பந்து வீச்சுத் தரவரிசையில் இந்திய வீரர் ஒருவர் கூட டாப் 10-ல் இல்லை, புவனேஷ் குமார்தான் அதிகபட்சமாக 13-ம் இடத்தில் உள்ளார்.

ஐசிசி ஒருநாள் போட்டிகள் அணிகள் தரவரிசையில் இந்தியா தற்போது 3-ம் இடத்தில் உள்ளது. இலங்கைக்கு எதிராக தம்புல்லாவில் ஞாயிறன்று தொடங்கும் ஒருநாள் போட்டித் தொடரில் இந்தியா 4-1 என்று தொடரை வென்றால் இதே 3-ம் இடத்தைத் தக்க வைக்க முடியும்.

114 புள்ளிகளில் இந்தியா 3-2 என்று இலங்கையை வீழ்த்தினால் கூட தசமப்புள்ளிகளில் இங்கிலாந்தை விட குறைவாகப் பெற்று பின்னடைவு கண்டு விடும். மாறாக இலங்கை நேரடியாக உலகக்கோப்பைக்குத் தகுதி பெறுவதை உறுதி செய்ய இந்தத் தொடர் ஒரு வாய்ப்பாக அமைந்துள்ளது. இலங்கை அணி குறைந்தது 2 போட்டிகளையாவது வெல்வது அவசியம். அப்போதுதான் இலங்கை தகுதி பெறுவதை உறுதி செய்துகொள்ள முடியும்.

உலகக்கோப்பைக்கு நேரடியாகத் தகுதி பெற இறுதிக்கெடு செப்டம்பர் 30-ம் தேதி. இலங்கை அணி 88 புள்ளிகளுடன் 8ம் இடத்தில் உள்ளது. மே.இ.தீவுகளை விட 10 புள்ளிகள் கூடுதலாகப் பெற்றுள்ளது.

ஐசிசி ஒருநாள் தரவரிசையில் கடைசி 4 இடங்களில் உள்ள அணிகள் தகுதிப் போட்டிகளில் ஆட வேண்டும். இதில் முதல் 2 இடங்களில் வரும் அணி 2019 உலகக்கோப்பைக்குத் தகுதி பெறும்.

இந்தத் தொடரில் 2 போட்டிகளில் இலங்கை வென்றால் 90 புள்ளிகளுக்குச் செல்லும். மாறாக மே.இ.தீவுகள் அயர்லாந்துக்கு எதிரான ஒரே ஒருநாள் போட்டியையும் வென்று இங்கிலாந்துக்கு எதிராக 5 போட்டிகளிலும் வென்றாலும் 88 புள்ளிகள்தான் வர முடியும். ஆனால் இந்தியா 4-1 என்று தொடரை வென்றால் இலங்கை அணி 88 புள்ளிகளில் இருக்கும். இந்நிலையில் மே.இ.தீவுகள் சாத்தியமில்லாத வெற்றிகளை பெற்றால் தசமப் புள்ளிகளில் இலங்கையை பின்னுக்குத் தள்ளிவிடும் ஆனால் இங்கிலாந்துக்கு எதிராக 5 போட்டிகளை வெல்லும் நிலையிலா உள்ளது மே.இ.தீவுகள்?

உதாரணமாக அயர்லாந்து அணிக்கு எதிராக மே.இ.தீவுகள் ஒரே போட்டியில் தோல்வி தழுவினால் அங்கிருந்து அதிகபட்சம் மே.இ.தீவுகள் 86 புள்ளிகளுக்குத்தான் வர முடியும். இந்நிலையில் இலங்கை இந்தியாவிடம் 0-5 என்று ஒயிட்வாஷ் ஆனாலும் இலங்கை அணியே புள்ளிகள் அளவில் மே.இ.தீவுகளைக் காட்டிலும் முன்னிலை பெறும்.