அசுரன் டிரைலருக்கு பாராட்டுகள் குவிந்து வருவதால் மிகவும் நெகிழ்ந்து போயுள்ளார் நடிகர் தனுஷ்.
வெற்றிமாறன் தனுஷ் கூட்டணி நான்காவது முறையாக இணைந்துள்ள படம் அசுரன். பூமணி எழுதி வெக்கை எனும் நாவலை தழுவி எடுக்கப்படும் படம் இது. இந்த படத்தில் தனுஷுக்கு ஜோடியாக பிரபல மலையாள நடிகை மஞ்சு வாரியர் நடித்துள்ளார்.
அசுரன் படத்தின் டிரைலர் கடந்த 8ம் தேதி ஞாயிற்றுக்கிழமை மாலை வெளியானது. முதல் சில மணி நேரங்களிலேயே பல லட்சம் பார்வைகளை பெற்றது அசுரன் டிரைலர். 24 மணி நேரத்திற்குள் 30 லட்சம் பார்வைகளை கடந்து புதிய சாதனை படைத்திருக்கிறது.
தனுஷ் ரசிகர்கள் மட்டுமல்லாது, சினிமா பிரபலங்களும் டிரைலரை பாராட்டி வருகின்றனர். இதனால் நெகிழ்ந்து போய் இருக்கிறார் தனுஷ். டிரைலரை பாராட்டியுள்ள ஒவ்வொருவருக்கும் அவர் தனித்தனியே நன்றி கூறி வருகிறார்.
