நடிகர் ரகுமான் கதையின் நாயகனாக நடித்திருக்கும் ‘ஆபரேஷன் அரபைமா’ படத்தின் படப்பிடிப்பு நிறைவடைந்ததாக படக்குழுவினர் தெரிவித்திருக்கிறார்கள்.
அறிமுக இயக்குனரும், முன்னாள் இந்திய கடற்படை வீரருமான பிராஷ் இயக்கத்தில் தயாராகி வரும் முதல் திரைப்படம் ‘ஆபரேஷன் அரபைமா’.
இதில் ‘துருவங்கள் 16’ படத்தின் மூலம் புகழ் பெற்ற நடிகர் ரகுமான் கதையின் நாயகனாக நடிக்கிறார். இவருடன் ‘நாடோடிகள்’ புகழ் அபிநயா, நடிகர் பாலாஜி, மலையாள நடிகர் டினி டாம், அனுப் சந்திரன், ஷிகாத், நேகா சக்சேனா, அரவிந்த், சஜி, மனிஷா, ரமேஷ் ஆறுமுகம், கௌரி லட்சுமி, மேபூ உள்ளிட்ட பலர் நடித்திருக்கிறார்கள்.
பீனிக்ஸ் உதயன் ஒளிப்பதிவு செய்திருக்கும் இந்த படத்திற்கு, ராகேஷ் பிரம்மானந்தன் இசை அமைத்திருக்கிறார்.
படத்தைப் பற்றி இயக்குனர் பிராஷ் பேசுகையில்,’ அரபி கடல் பகுதியில் நடைபெற்ற ஒரு உண்மையான இராணுவ ரீதியிலான ஆபரேஷனை தழுவி எடுக்கப்பட்ட திரைப்படம் ‘ஆபரேஷன் அரபைமா’.
நாட்டிற்கு பேராபத்தை விளைவிக்கும் நோக்கத்துடன் வெளிநாட்டினர், தேச எல்லையைக் கடந்து நம் நாட்டிற்குள் ஊடுருவும்போது, அதை எதிர்த்து இராணுவ வீரர்கள் போராடும் போராட்டம் தான் இப்படத்தின் திரைக்கதை.
தமிழ்நாடு, கேரளா, அந்தமான், கோவா, டுபாய் உள்ளிட்ட பல இடங்களில் இப்படத்தின் படப்பிடிப்பு நடைபெற்றிருக்கிறது. இப்படத்தின் தலைப்புக்கு ஏற்றவாறு உண்மையான ஆபரேஷன் காட்சிகளை வடிவமைப்பதற்காக கேரள பொலிஸ் மற்றும் தேசிய பாதுகாப்பு மையத்தில் பணியாற்றும் சில உயரதிகாரிகளை வரவழைத்து அவர்களின் ஆலோசனையுடன் அக்காட்சிகளை வடிவமைத்திருக்கிறோம்.
இது இரசிகர்களை ஆச்சரியப்படுத்தும். படப்பிடிப்பை நிறைவு செய்திருக்கிறோம். தற்போது இறுதிக்கட்ட பணிகள் விறுவிறுப்பாக நடைபெற்று வருகிறது. விரைவில் டீசர் மற்றும் சிங்கிள் டிராக் வெளியிடப்படும்’ என்றார்.
‘ஆபரேஷன் அரபைமா’ என்ற படத்தின் டைட்டிலுக்காகவும், படத்தை இயக்கியிருப்பது முன்னாள் கடற்படை வீரர் என்பதாலும், ‘துருவங்கள் பதினாறு’ படத்திற்கு பிறகு நடிகர் ரகுமான் வித்தியாசமான தோற்றத்தில் முதன்மையான கதாபாத்திரத்தில் நடித்திருப்பதாலும் இப்படத்திற்கான எதிர்பார்ப்பு பார்வையாளர்களிடத்தில் அதிகரித்திருக்கிறது.
_____________________________________________________________________________
உடனுக்குடன், உவப்பான செய்திகளுக்கு: http://Facebook page / easy 24 news
