உள்ளூராட்சி சபைத் தேர்தலுக்கான வேட்புமனுக்கள் நிராகரிக்கப்பட்ட நபர்கள் நீதிமன்றத்தில் மீள் பரிசீலனைக்காக கோரிக்கை முன்வைக்க சகல உரிமையும் உள்ளது. நீதிமன்றம் சம்மதம் தெரிவித்தால் உரிய தொகுதிகளில் தேர்தல் பிற்போகவும் வாய்ப்புகள் உள்ளதாக மாகாணசபைகள் மற்றும் உள்ளூராட்சி சபைகள் அமைச்சர் பைசர் முஸ்தபா தெரிவித்தார்.
எனினும் ஒரே நேரத்தில் தேர்தலை நடத்த வேண்டும் என்ற ஏகமனதான ஒத்துழைப்பு உள்ளதனால் தேர்தலில் எந்த சிக்கலும் வராது எனவும் அவர் குறிப்பிட்டார்.
கொழும்பு வெள்ளவத்தையில் நேற்று இடம்பெற்ற செய்தியாளர் சந்திப்பில் கலந்துகொண்ட அமைச்சர் இதனைக் குறிப்பிட்டார். இது குறித்து அவர் மேலும் கூறுகையில்.
நடைபெறவுள்ள உள்ளூராட்சி சபைத் தேர்தல் கட்சிகளை இலக்கு வைத்த ஒன்றல்ல, மாறாக பிரதிநிதிகளை இலக்காக கொண்டதாகும். தமது பிரதேசங்களில் மக்களுக்காக சேவை செய்யும் உறுப்பினர்களை மக்களே தெரிவுசெய்யும் தேர்தல். இதில் பிரதான கட்சிகளை விளம்பரப்படுத்தி அல்லது அதிகாரங்களை பயன்படுத்தி எதையும் செய்துவிட முடியாது. இறுதி முடிவு மக்களின் கைகளில் உள்ள நிலையில் அதுவே தீர்மானமாகும். மேலும் கடந்த காலங்களை போலல்லாது சுயாதீனமாகவும் ஜனநாயக ரீதியிலுமே தேர்தல் இடம்பெறவுள்ளது. ஆகவே மக்களின் தீர்மானம் என்ன என்பது எமக்கு நன்றாகவே தெரியும்.
மேலும் ஒரு குடும்பத்திற்கு ஒருவர் என்ற நிலைப்பாட்டில் அரசியல் செய்ய வேண்டும் என்பதே எனது தனிப்பட்ட நிலைப்பாடாகும். குடும்ப அரசியலுக்கு அப்பால் மக்கள் பிரதிநிகள் மக்களின் நலன் கருதியும் அடுத்த நபருக்கு வாய்ப்புகளை ஏற்படுத்திக் கொடுக்கும் வகையிலும் அரசியல் செயற்பாடுகளில் ஈடுபட வேண்டும். எனினும் கடந்த காலங்களில் அவ்வாறு இல்லாது குடும்ப அரசியலே சகல இடங்களிலும் நிலவின. தந்தை பாராளுமன்றத்தில், தாய் மாகாணசபையில், பிள்ளைகள் பிரதேசசபையில் தமக்கான இடங்களை தக்க அவைத்துகொண்டு அதிகாரங்களின் மூலமாக ஆட்சி செய்த காலம் இனிமேலும் உருவாக்கப்பட கூடாது. இதுவரையில் அவ்வாறு குடும்ப அரசியல் இருந்ததும் அதைக்கண்டு அஞ்சியதும் போதும். இது நாட்டிற்கு பொருந்தாத ஒன்றாகும். மக்களும் அதனை நிராகரித்து விட்டனர்.
ஊடகங்களும் மக்களுக்கு சரியான தலைமைத்துவம் குறித்த தெளிவுகளை முன்வைக்க வேண்டும். மக்கள் பக்கம் நின்றே ஊடகங்கள் செயற்பட வேண்டும். அதுவே இலங்கையின் எதிர்கால நலனுக்கு மிகவும் பொருத்தமானதாக அமையும். மேலும் தற்போது எமது அமைச்சிற்கு புதிய இராஜாங்க அமைச்சர் நியமிக்கப்பட்டுள்ளார். கடந்த 10 மாதங்களுக்கும் மேலாக நான் தனியாக சகல பொறுப்புக்களையும் கையாண்டேன். மிகவும் கடினமான ஒரு வேலையினை நான் முன்னெடுத்தேன். எனினும் இப்போது தகுதியான ஒருவரை ஜனாதிபதி நியமித்துள்ளார். ஆகவே அவருக்கு அதிகாரங்களை கொடுத்துவிட்டு நான் மக்கள் பணியினை சரியாக செய்ய முடியும் என நம்புகின்றேன்.
மேலும் 93 பிரதேச சபைகளுக்கான வேட்புமனு தாக்கல் நேற்றுடன் (நேற்று முன்தினம்) முடிவுக்கு வந்துள்ளது. எனினும் இதில் பொது எதிரணி உள்ளிட்ட சில கட்சிகளின் வேட்புமனுக்கள் நிராகரிக்கப்பட்டுள்ளன. குறிப்பாக பொது எதிரணியின் வேட்புமனு நிராகரிப்பு என்பது ஆச்சரியமான ஒரு விடயம் அல்ல. அக்கட்சியின் தலைவர் ஜி.எல்.பீரிஸ் பொறுப்புக்களை ஏற்றுக்கொண்ட போதே தவறுகள் இடம்பெறும் என்பது எமக்கு தெரியும். வெறுமனே புத்தகத்தை மட்டுமே அடிப்படையாக கொண்டு செயற்படும் நபரே அவர். ஆகவே அவர்கள் குறித்து சொல்வதற்கு ஒன்றும் இல்லை. எனினும் வேட்புமனு நிராகரிக்கப்பட்ட போதிலும் நிராகரிக்கப்பட்ட நபர்கள் நீதிமன்றம் சென்று மீண்டும் தமக்கான வாய்ப்புகளை கோர முடியும். நிராகரிக்கப்பட்ட நபர்கள் நீதிமன்றத்தில் மீள்பரிசீலனைக்கான வழக்கு தாக்கல் செய்யும் பட்சத்தில் நீதிமன்றம் இது குறித்து தமது நிலைப்பாட்டினை தெரிவிக்கும். எனினும் அவ்வாறு மீள் பரிசீலனை குறித்து நீதிமன்றினால் அனுமதி வழங்கப்படுமாயின் குறித்த தொகுதியின் தேர்தல்கள் பிற்போகவும் வாய்ப்புகள் உள்ளன. எனினும் இப்போதுள்ள நிலையில் சகல தொகுதிகளிலும் ஒரே நேரத்தில் தேர்தலை நடத்த வேண்டிய நிலைமை உள்ளதனால் தேர்தல் பிற்போக வாய்ப்புகள் மிகவும் குறைவாகவே உள்ளன. எவ்வாறு இருப்பினும் நிராகரிக்கப்பட்ட நபர்கள் தமது நியாயமான கோரிக்கைக்காக நீதிமன்றம் செல்ல சகல உரிமையும் உள்ளது. அதை எவராலும் தடுக்க முடியாது.
அதேபோல் இந்த தேர்தல் குறித்து சில விமர்சனங்களும் எழுந்துள்ளன. குறிப்பாக அதிக நிதி செலவில் தேர்தலை நடத்த அரசாங்கம் முயற்சித்து வருவதாக கூறுகின்றனர். இந்தக் கருத்தினை நானும் மறுக்கவில்லை. காரணாம் என்னவெனில் கடந்த காலங்களை போல் அல்லாது மாற்று முறைமையில் இம்முறை தேர்தல் இடம்பெற்று வருகின்றது. எல்லை நிர்ணயம், சகல தொகுதிக்கும் ஒரே தினத்தில் தேர்தல், சகல கட்சிகள், சுயேட்சைக்குழுக்கள் நலன்களை கருத்தில் கொண்ட மாற்றம், பெண்கள் பிரதிநிதித்துவம் என அனைத்தும் சரியாக அமைய வேண்டும் என்ற காரணத்தினால் கால விரயம், நேர விரயம், பண விரையம் ஏற்படுவதை தடுக்க இயலாது. எனினும் விமர்சனம் முன்வைக்கும் நபர்கள் மறுபுறம் எமது சிக்கல்களையும் கவனத்தில் கொள்ள வேண்டும் எனவும் அவர் குறிப்பிட்டார்.
