தமிழக முன்னாள் முதல்வர் ஜெயலலிதா மரணத்தில் பல்வேறு சந்தேகங்களை பல அரசியல் கட்சியினர் எழுப்பி வரும் நிலையில், ஜெயலலிதா தொடர்பான வீடியோ ஒன்று சசிகலா குடும்பத்தாரிடம் இருப்பதாக தகவல் வெளியாகியுள்ளது.
ஜெயலலிதா மறைவு குறித்து சமூக வலைதளங்களில் விமர்சிப்பவர்கள் சசிகலா குடும்பம் தான் ஜெயலலிதாவை கொன்றார்கள் என கடுமையாக சாடி வந்தனர்.
இதனால் சசிகலா குடும்பத்தின் மீது ஒரு எதிர்மறையான கருத்தே நிலவி வந்தது. இதனை ஓபிஎஸ் அணியினரும் தங்களுக்கு சாதகமாக பயன்படுத்திக் கொண்டு சசிகலாவுக்கு எதிராக பிரசாரம் மேற்கொண்டு வருகின்றனர்.
இந்த சூழலில் தான் சசிகலாவின் தம்பி திவாகரனின் மகன் ஜெய் ஆனந்த் ஜெயலலிதா மருத்துவமனையில் சிகிச்சை எடுத்துவந்த வீடியோ தங்களிடம் இருப்பதாகவும், அதை எப்பொழுது வேண்டுமானாலும் வெளியிடுவோம் என கூறியிருந்தார்.
இதனால் தமிழக அரசியலில் பரபரப்பு நிலவியது. இதனை தொடர்ந்து கர்நாடக மாநில அதிமுக செயலாளர் புகழேந்தியும் ஜெயலலிதா சிகிச்சையில் இருந்த போது எடுத்த வீடியோ இருப்பதாகவும் அதனை எந்த நேரத்திலும் வெளியிடுவோம் என கூறி பரபரப்பை மேலும் கூட்டினர்.
இந்நிலையில் அந்த வீடியோவில் என்ன இருக்கிறது என்ற தகவல்கள் தற்போது பரவி வருகிறது. அதில், ஜெயலலிதா மருத்துவமனையில் இருக்கும் போது சசிகலாவை கடுமையாக திட்டியது போன்ற காட்சிகள் இடம்பெற்றுள்ளதாக தகவல்கள் வெளிவருகின்றன.
மேலும் ஜெயலலிதாவின் அரசியல் எதிரியையும், அவரது குடும்பத்தையும் கேவலமாக பேசும் காட்சிகள் உள்ளதாகவும், இந்த வீடியோ வெளியிட முடியாத நிலையில் உள்ளதாகவும் தகவல்கள் வருகின்றன. அரசியல் ரீதியாக ஜெயலலிதாவின் புகழுக்கு இந்த வீடியோ உலை வைத்துவிடும் எனவும் சசிகலா குடும்பம் அஞ்சுவதாக கூறப்படுகிறது.
அப்பல்லோ செவிலியர் ஒருவர் மூலம் இந்த வீடியோ ரகசியமாக எடுக்கப்பட்டதாகவும் இதனை சசிகலா குடும்பத்தினர் பாதுகாப்பாக வைத்துள்ளதாகவும் தகவல்கள் தெரிவிக்கின்றன.
வீடியோ எடுத்த செவிலியரும் இதனை வெளியில் சொல்லாமல் ரகசியமாக காத்து வருகிறார். ஆனால் இந்த வீடியோ எந்த நேரத்தில் வேண்டுமானாலும் வெளிவரலாம் என கூறப்படுகிறது.
