ஹெடிங்லே, லீட்ஸ் விளையாட்டரங்கில் நேற்று நடைபெற்ற இங்கிலாந்துக்கு எதிரான இரண்டாவது சர்வதேச ஒருநாள் கிரிக்கெட் போட்டியில் அணித் தலைவர் குசல் மெண்டிஸ் குவித்த அபார சதம், துனித் வெல்லாலகேவின் சிறப்பான பந்துவீச்சு என்பன இலங்கையை 16 ஓட்டங்களால் வெற்றிபெறச் செய்தன.
இங்கிலாந்துக்கு எதிராக இரண்டு வகை சர்வதேச மட்டுப்படுத்தப்பட்ட ஓவர் கிரிக்கெட் போட்டிகளில் விளையாடி வரும் இலங்கை இந்த சுற்றுப் பயணத்தில் ஈட்டிய முதலாவது வெற்றி இதுவாகும்.
இந்த வெற்றியுடன் 3 போட்டிகள் கொண்ட சர்வதேச ஒருநாள் கிரிக்கெட் தொடரை 1 – 1 என இலங்கை சமப்படுத்திக்கொண்டுள்ளது.
ஹெடிங்லேயில் 2019 இல் இங்கிலாந்துக்கு எதிராக பெற்ற கடைசி வெளிநாட்டு ஒருநாள் வெற்றிக்கு பின்னர் ஏழு வருடங்கள் கழித்து மீண்டும் இலங்கை அணி கடுமையாக போராடி வெற்றிபெற்றுள்ளது.
இந்த சுற்றுப் பயணத்தில் முதல் தடவையாக ஒரு வித்தியாசமான உத்வேகத்தடன் இலங்கை அணி விளையாடியதை அவதானிக்க முடிந்தது.
குசல் மெண்டிஸ் குவித்த ஏழாவது ஒருநாள் கிரிக்கெட் சதம், கமிந்து மெண்டிஸ், பவன் ரத்நாயக்க, ஜனித் லியனகே ஆகியோரின் சிறந்த துடுப்பாட்ட பங்களிப்பு என்பன இலங்கைக்கு பெரிதும் கைகொடுத்தன.
அதேவேளை, குசல் மெண்டிஸின் சிறப்பான தலைமைத்துவமும் அவர் வகுத்த கள வியூகங்களும் இங்கிலாந்துக்கு தோல்வியை கொடுத்தது.
மேலும் இந்தப் போட்டியில் இங்கிலாந்து சார்பாக மிகத் திறமையாகத் துடுப்பெடுத்தாடிக்கொண்டிருந்த ஜொஸ் பட்லர் தசைப்பிடிப்புக்குள்ளாகி தற்காலிக ஓய்வு பெற்றதும் இலங்கைக்கு சாதகமாக அமைந்தது.
இப் போட்டியில் முதலில் துடுப்பெடுத்தாடிய இலங்கை 50 ஓவர்களில் 6 விக்கெட்களை இழந்து 321 ஓட்டங்களைக் குவித்தது.
குசல் மெண்டிஸ் மிகத் திறமையாகத் துடுப்பெடுத்தாடி 100 பந்துகளில் 14 பவுண்டறிகள், 3 சிக்ஸ்களுடன் 121 ஓட்டங்களைப் பெற்றார்.
கமிந்து மெண்டிஸ் 54 ஓட்டங்களையும் பவன் ரத்நாயக்க 48 ஓட்டங்களையும் ஜனித் லியனகே 32 ஓட்டங்களையும் பெத்தும் நிஸ்ஸன்க 25 ஓட்டங்களையும் பெற்றனர்.
பந்துவீச்சில் ரெஹான் அஹ்மத் 48 ஓட்டங்களுக்கு 2 விக்கெட்களையும் கஸ் அட்கின்சன் 55 ஓட்டங்களுக்கு 2 விக்கெட்களையும் கைப்பற்றினர்.
பதிலுக்கு துடுப்பெடுத்தாடிய இங்கிலாந்து 50 ஓவர்களில் 9 விக்கெட்களை இழந்து 305 ஓட்டங்களைப் பெற்று தோல்வி அடைந்தது.
டொம் பென்டன் (73), பென் டக்கெட் (67) ஆகிய இருவரும் 143 ஓட்டங்களைப் பகிர்ந்து சிறப்பான ஆரம்பத்தை இட்டுக்கொடுத்தனர்.
தொடர்ந்து 38ஆவது ஓவரில் இங்கிலாந்து 4 விக்கெட்களை இழந்து 254 ஓட்டங்களைப் பெற்று பலமான நிலையில் இருந்தபோது தசைப் பிடிப்புக்குள்ளான ஜொஸ் பட்லர் தற்காலிக ஓய்வு பெற்றார். அவர் அப்போது 67 ஓட்டங்களைப் பெற்றிருந்தார்.
வில் ஜெக்ஸுடன் 5ஆவது விக்கெட்டில் 52 ஓட்டங்களைப் பகிர்ந்த நிலையிலேயே பட்லர் ஓய்வுபெற்றார்.
அதன் பின்னர் 42 ஓட்டங்கள் வித்தியாசத்தில் அடுத்த 5 விக்கெட்களை வீழ்த்திய இலங்கை அபார வெற்றியீட்டியது.
7ஆவது விக்கெட் வீழ்ந்ததும் மீண்டும் துடுப்பெடுத்தாட ஆடுகளம் நுழைந்த ஜொஸ் பட்லர் மேலும் 2 ஓட்டங்களைப் பெற்று 69 ஓட்டங்களுடன் ஆட்டம் இழந்தார்.
வில் ஜெக்ஸ் 52 ஓட்டங்களைப் பெற்றார்.
பந்துவீச்சில் துனித் வெல்லாலகே 49 ஓட்டங்களுக்கு 3 விக்கெட்களையும் ஏஷான் மாலிங்க 50 ஓட்டங்களுக்கு 2 விக்கெட்களையும் டில்ஷான் மதுஷன்க 54 ஓட்டங்களுக்கு 2 விக்கெட்களையும் கைப்பற்றினர்.
