கிளிநொச்சியில் காணாமல் ஆக்கப்பட்டவர்களின் உறவினர்களால் மேற்கொள்ளப்பட்டு வரும் கவனயீர்ப்பு போராட்டம் இன்று எட்டாவது நாளாகவும் தொடர்கிறது.

வலிந்து காணாமல் ஆக்கப்பட்டவர்களின் விடுதலையையும் வெளிப்படுத்தலையும் வலியுறுத்தி குறித்த போராட்டம் தொடர்ச்சியாக முன்னெடுக்கப்படுகின்றது.

கடந்த 20ஆம் திகதி கிளிநொச்சி கந்தசுவாமி ஆலயம் முன்றலில் ஆரம்பமான இந்த கவனயீர்ப்பு போராட்டம் இன்று திங்கட்கிழமை எட்டாவது நாளாகவும் தொடர்கிறது.

வலிந்து காணாமல் ஆக்கப்பட்டவர்களின் விடயத்தில் இனியும் காலம் தாமதிக்க வேண்டாம் எனவும் இலங்கை அரசுக்கு பொறுப்புக் கூறல் விடயத்தில் ஐ.நா கால அவகாசம் வழங்க கூடாது என்றும் காணாமல் ஆக்கப்பட்டவர்களின் உறவினர்களால் வலியுறுத்தப்பட்டுள்ளது.

தங்களுக்கு உறுதியான தீர்வு கிடைக்கும் வரையிலும் இந்த கவனயீர்ப்பு போராட்டத்தை தொடரப் போவதாகவும் காணாமல் ஆக்கப்பட்டவர்களின் உறவினர்கள் தெரிவித்துள்ளனர்.

இதேவேளை இன்று மாலை பாராளுமன்ற உறுப்பினர் சிவசக்தி ஆனந்தன் மற்றும் முன்னாள் பாராளுமன்ற உறுப்பினர் சுரேஸ் பிறேமச் சந்திரன் ஆகியோர் போராட்டத்தில் ஈடுபட்டுள்ள மக்களை சந்தித்து கலந்துரையாடினர்.

இதன்போது காணாமல் ஆக்கப்பட்டவர்களின் உறவினர்கள் நிபந்தனையுடன் கால அவகாசம் வழங்கவேண்டும் என எதிர்க்கட்சி தலைவர் சம்மந்தன் விடுத்த அறிக்கைக்கு தங்களது கடும் கண்டனத்தை வெளிப்படுத்தியுள்ளனர்.