வாகனப் பயன்பாடு மற்றும் எரிபொருள் நுகர்வு தொடர்பாக முன்வைக்கப்பட்டுள்ள குற்றச்சாட்டுகளை முன்னாள் சபாநாயகர் மகிந்த யாப்பா அபேவர்தன, வன்மையாக மறுத்துள்ளார்.
மேலும், தணிக்கை அறிக்கையின் தரவுகள் சில குழுக்களால் அரசியல் நோக்கங்களுக்காகத் திரிக்கப்படுவதாகவும் அவர் குற்றம் சுமத்தியுள்ளார்.
2015 முதல் 2024 வரையிலான காலகட்டத்தில் நாடாளுமன்ற அதிகாரிகளின் வாகனப் பயன்பாடு குறித்த அவதானிப்புகள் தொடர்பாக பொதுமக்களைத் தவறாக வழிநடத்த முயற்சிகள் மேற்கொள்ளப்படுவதாக அபேவர்தன அறிக்கை ஒன்றில் தெரிவித்துள்ளார்.
அதிகாரப்பூர்வமாக வழங்கப்பட்ட வாகனங்கள்
சபாநாயகராகப் பணியாற்றியபோது ஒன்பது வாகனங்களைப் பயன்படுத்தியதாகக் கூறப்படும் குற்றச்சாட்டுகளை முற்றிலும் பொய்யானவை என நிராகரித்த அவர், நாடாளுமன்றத்தால் அதிகாரப்பூர்வமாக வழங்கப்பட்ட வாகனங்களை மட்டுமே தாம் பயன்படுத்தியதை தணிக்கை அறிக்கையே உறுதி செய்வதாகவும் அவர் வலியுறுத்தியுள்ளார்.
ஜனாதிபதி செயலக சுற்றறிக்கைகள் மற்றும் அரசு விதிமுறைகளுக்கு இணங்க, குறிப்பாக பாதுகாப்புத் தேவைகளுக்காக அனைத்து வாகனங்களும் ஒதுக்கப்பட்டதாக அவர் அந்த அறிக்கையில் விளக்கியுள்ளார்.
”ஜூலை 2022-க்குப் பிறகு நாட்டில் நிலவிய சிறப்புப் பாதுகாப்புச் சூழ்நிலையைத் தொடர்ந்து, அவரது பாதுகாப்பிற்காகக் கூடுதல் பணியாளர்களும் வாகனங்களும் ஈடுபடுத்தப்பட்டன.
அதிக எரிபொருள் நுகர்வு
பாதுகாப்பு அமைச்சகத்தின் பரிந்துரைகளின் பேரில், ஜனாதிபதி செயலகம் அதிக எரிபொருள் நுகர்வு கொண்ட குண்டு துளைக்காத வாகனத்தை வழங்கியது.
இதுவே எரிபொருள் விலை உயர்வுக்கு முக்கிய காரணம். நாட்டின் மூன்றாவது குடிமகனான சபாநாயகர் மேற்கொள்ளும் உத்தியோகப்பூர்வ வாகன அணிவகுப்புகள் மற்றும் நாடு தழுவிய சுற்றுப்பயணங்களின் எரிபொருள் நுகர்வை, ஒரு சாதாரண தனிநபரின் சொந்த வாகனப் பயன்பாட்டுடன் ஒப்பிடுவது அறிவியல் பூர்வமற்றது.
சபாநாயகர் என்ற முறையில் நாடு முழுவதும் விரிவாகப் பயணிக்க வேண்டியிருந்தது. அத்தகைய கடமைகளுக்கு இயல்பாகவே அதிக எரிபொருள் தேவைப்படும்” என்றும் அவர் மேலும் கூறியுள்ளார்.
