நடிகர் ராகவா லோரன்ஸ் மற்றும் எஸ். ஜே. சூர்யா கதையின் நாயகர்களாக நடிக்கவிருக்கும் ‘ஜிகர்தண்டா’ படத்தின் இரண்டாம் பாகத்திற்கு ‘ஜிகிர்தண்டா டபுள் எக்ஸ்’ என பெயரிடப்பட்டு, அதன் குறு முன்னோட்டம் வெளியிடப்பட்டிருக்கிறது.
இயக்குநர் கார்த்திக் சுப்புராஜ் இயக்கத்தில் நடிகர் சித்தார்த், பொபி சிம்ஹா, லட்சுமி மேனன் நடிப்பில் 2014ஆம் ஆண்டில் வெளியாகி வெற்றி பெற்ற திரைப்படம் ‘ஜிகர்தண்டா’. கொமடி வித் எக்சன் ஜேனரில் வெளியான இந்த திரைப்படத்தின் இரண்டாம் பாகம் தற்போது தயாராகிறது. இதற்கு வழக்கம் போல் ‘ஜிகர்தண்டா 2’ என பெயரிடப்படாமல், ‘ஜிகர்தண்டா டபுள் எக்ஸ்’ என பெயரிடப்பட்டு, இதன் ஃபர்ஸ்ட் லுக் மற்றும் டீசர் வெளியிடப்பட்டிருக்கிறது.
இதில் ராகவா லோரன்ஸ், எஸ். ஜே. சூர்யா, நடிகை நிமிஷா சஜயன் உள்ளிட்ட பலர் நடித்திருக்கிறார்கள். எஸ். திருநாவுக்கரசு ஒளிப்பதிவு செய்திருக்கும் இந்த திரைப்படத்திற்கு சந்தோஷ் நாராயணன் இசையமைக்கிறார். கார்த்திக் சுப்புராஜின் ஸ்டோன் பெஞ்ச் ஃபிலிம்ஸ் இப்படத்தை தயாரிக்கிறது. தமிழ், தெலுங்கு, இந்தி ஆகிய மொழிகளில் தயாராகவிருக்கும் இப்படத்தின் படப்பிடிப்பிற்காக பட குழுவினர் தற்போது மதுரையில் முகாமிட்டிருக்கிறார்கள்.
இரண்டாம் பாகத்தின் படப்பிடிப்பு தொடங்கும் முன்னரே ‘ஜிகர்தண்டா டபுள் எக்ஸ்’ படம் எப்படி இருக்கும்? என்பதனை ரசிகர்களுக்கு அறிமுகப்படுத்தும் வகையில் இப்படத்தில் முன்னோட்டம் அமைந்திருக்கிறது. இதில் எஸ். ஜே. சூரியா மற்றும் ராகவா லோரன்ஸ் இருவரும் இதுவரை திரையில் தோன்றிறாத வகையில் புதிய தோற்றத்தில் நடிக்கிறார்கள். எக்சன் காட்சிகளும் புதுவிதமாக அமைக்கப்பட்டிருப்பதால்… ரசிகர்களிடத்தில் பெரும் எதிர்பார்ப்பை ஏற்படுத்தி இருக்கிறார்கள்.
