‘காந்த குரலோன்’ அர்ஜுன் தாஸ் நடிக்கும் ‘அநீதி’ திரைப்படத்தின் முன்னோட்டம் வெளியாகி, அனைத்து தரப்பு பார்வையாளர்களின் கவனத்தை கவர்ந்து வருகிறது.
முன்னணி நட்சத்திர இயக்குநரான வசந்த பாலன் இயக்கத்தில் தயாராகி இருக்கும் புதிய திரைப்படம் ‘அநீதி’. இதில் அர்ஜுன் தாஸ், துஷாரா விஜயன், அர்ஜுன் சிதம்பரம், வனிதா விஜயகுமார், அருண் வைத்தியநாதன், ஷா ரா உள்ளிட்ட பலர் நடித்திருக்கிறார்கள். ஏ. எம். எட்வின் சகாய் ஒளிப்பதிவு செய்திருக்கும் இந்த திரைப்படத்திற்கு ஜி. வி. பிரகாஷ் குமார் இசைறமைத்திருக்கிறார்.
தயாரிக்கப்பட்ட உணவை வாடிக்கையாளர்களுக்கு விநியோகம் செய்யும் தனியார் நிறுவனத்தில் பணியாற்றும் ஊழியர்களின் வாழ்வியலை வலியுடன் பேசும் இந்த திரைப்படத்தை அர்பன் பொய்ஸ் ஸ்டுடியோஸ் எனும் பட நிறுவனம் சார்பில் தயாரிப்பாளர்கள் எம். கிருஷ்ணகுமார், முருகன் ஞானவேல், வரதராஜன் மாணிக்கம், ஜி. வசந்தபாலன் ஆகியோர் இணைந்து தயாரித்திருக்கிறார்கள்.
எதிர்வரும் 21 ஆம் திகதியன்று உலகம் முழுவதும் பட மாளிகையில் வெளியாகவிருக்கும் இத்திரைப்படத்தின் முன்னோட்டம் வெளியிடப்பட்டிருக்கிறது. இந்த முன்னோட்டத்தில் நாயகன் அர்ஜுன் தாஸ் உணவு விநியோகச் செய்யும் தனியார் நிறுவன ஊழியராக பணியாற்றுகிறார். இந்த ஊழியர்களின் திறன் சுரண்டல், மன அழுத்தம், பாதுகாப்பற்ற பணி வாய்ப்பு, அவமானப்படுத்தும் வாடிக்கையாளர்கள்… என பல விடயங்கள் இடம் பெற்றிருப்பதால் படத்தை பற்றிய எதிர்பார்ப்பை அதிகரிக்க வைத்திருக்கிறது.
