அரச உத்தியோகத்தர்கள் மற்றும் ஓய்வூதியதாரர்களின் சம்பளம் மற்றும் ஓய்வூதியக் கொள்கை தொடர்பில் பிரதமர் ஹரிணி அமரசூரிய அறிவிப்பன்றை வெளியிட்டுள்ளார்.
அதன்படி, சம்பளம் மற்றும் ஓய்வூதியக் கொள்கையை நிலைபேறான முறையில் முகாமைத்துவம் செய்வதற்கும், பல வருடங்களாக நிலவிவரும் சம்பள முரண்பாடுகளுக்குத் தீர்வுகளை வழங்குவதற்கும் தேவையான நடவடிக்கைகள் மேற்கொள்ளப்பட்டு வருவதாக அவர் மேலும் சுட்டிக்காட்டினார்.
நாடாளுமன்றத்தில் நேற்று (24) உரையாற்றும் போதே பிரதமர் இந்த விடயங்களைக் குறிப்பிட்டுள்ளார்.
அதிவிசேட வர்த்தமானி அறிவித்தல்
அவர் மேலும் தெரிவிக்கையில், இப் பிரச்சினைகளைத் தீர்ப்பதற்காக 2026.06.22 ஆம் திகதிய 2494/05 ஆம் இலக்க அதிவிசேட வர்த்தமானி அறிவித்தலின் மூலம் அரச உத்தியோகத்தர்களின் சம்பளம் மற்றும் ஓய்வூதிய ஆணைக்குழு நியமிக்கப்பட்டுள்ளது.
முழு அரச சேவையிலும் கட்டமைப்பு ரீதியான மறுசீரமைப்புகளுக்கான பரிந்துரைகளை முன்வைத்தல், புதிய தொழில்நுட்ப மற்றும் உலகளாவிய போக்குகளுக்கு ஏற்ப எதிர்காலத் தேவைகளை முன்னறிவித்தல், அத்துடன் பிரஜைகளை மையமாகக் கொண்ட, ஒழுக்கநெறிகளைக் கடைப்பிடிக்கும் மற்றும் பொறுப்புக்கூறல் கொண்ட அரச சேவையொன்றைக் கட்டியெழுப்புவதற்குத் தேவையான உத்திகளை முன்வைத்தல் ஆகியவை இந்த ஆணைக்குழுவின் பிரதான பொறுப்புகளில் அடங்கும்.
குறித்த வர்த்தமானி அறிவித்தலுக்கு அமைய, ஆணைக்குழு ஒரு வருடத்திற்குள் தனது பரிந்துரைகளுடன் கூடிய அறிக்கையை ஜனாதிபதியிடம் சமர்ப்பிக்க வேண்டியுள்ளது.
ஜனாதிபதியிடம் சமர்ப்பிக்க நடவடிக்கை
அத்துடன், அதற்கான முன்மொழிவுகள், கருத்துகள் மற்றும் கோரிக்கைகள் தொழிற்சங்கங்கள், பல்வேறு அமைப்புகள் மற்றும் பொதுமக்களிடமிருந்து தற்போது கிடைத்து வருகின்றது.
அந்த முன்மொழிவுகளை ஆய்வு செய்து தயாரிக்கப்படும் இந்தச் செயற்பாட்டின் முன்னேற்றம் தொடர்பான காலாண்டு அறிக்கையொன்றையும் ஜனாதிபதியிடம் சமர்ப்பிக்க நடவடிக்கை எடுக்கப்படும்.
மேலும், அரச உத்தியோகத்தர்களின் சம்பளம் மற்றும் ஓய்வூதிய ஆணைக்குழுவிற்காக பராமரிப்புச் சேவைகள் மற்றும் சொத்துக்களைக் கொள்வனவு செய்வதற்காக 2026.09.18 ஆம் திகதி வரை எவ்வித செலவும் மேற்கொள்ளப்படவில்லை, குறித்த திகதி வரையில் சம்பளம் மற்றும் கொடுப்பனவுகளுக்காகவும் எவ்வித பணமும் செலவிடப்படவில்லை.
எவ்வாறாயினும், 2026 செப்டெம்பர் மாத சம்பளத்தை வழங்கும்போது ஆணைக்குழுவின் 04 உத்தியோகத்தர்களுக்கான சம்பளம் மற்றும் கொடுப்பனவுகளாக ஏறத்தாழ 508,988.00 ரூபாய் தொகையை செலுத்த வேண்டியுள்ளது” என பிரதமர் தெரிவித்தார்.
