ஜே.எஸ்.பி பிலிம் ஸ்டூடியோஸ் சார்பில் சதீஷ் தயாரித்துள்ள படம் அசுரகுரு. விக்ரம் பிரபு, மகிமா நம்பியார், யோகி பாபு, மனோபாலா, ஜெகன், நாகி நீடு உள்பட பலர் நடித்திருக்கிறார்கள். எஸ்.ராமலிங்கம் ஒளிப்பதிவு செய்துள்ளார், கணேஷ் ராகவேந்திரா இசை அமைத்துள்ளார். ஏ.ராஜ்தீப் இயக்கி உள்ளார்.
நீண்ட நாள் தயாரிப்பில் இருந்த இந்தப்படம் தற்போது ரிலீசுக்கு தயாராகி இருக்கிறது. இதுகுறித்து இயக்குனர் ஏ.ராஜ்தீப் கூறியதாவது: இவ்வுலகில் பிறந்த ஒவ்வொருவருக்கும் ஒரு தேடல் உண்டு. சிலருக்கு புகழின் மீது தேடல், சிலருக்கு அதிகாரத்தின் மீது தேடல் என இந்த பட்டியல் நீளும்.
இந்த படத்தின் ஹீரோ சக்திக்கு பணத்தின் மீது தேடல். சக்தி எதற்காக பணத்தை தேடி ஓடுகிறான். பணத்தை அடைய என்னவெல்லாம் செய்கிறான் என்பதுதான் படம். பணம் வாழ்க்கைக்கு மிகவும் அவசியம்தான். ஆனால் பணமே வாழ்க்கையில்லை என்பதை சொல்லும் படம். அனைத்து பணிகளும் முடிந்து வருகிற மார்ச் 13ந் தேதி வெளிவருகிறது. என்றார்.
