பாகிஸ்தான் அணிக்கு எதிரான 2வது டெஸ்ட் போட்டியில் இங்கிலாந்து அணி 330 ஓட்டங்கள் வித்தியாசத்தில் அபார வெற்றி பெற்றுள்ளது.

இந்த டெஸ்ட் போட்டியில் நாணய சுழற்சியில் வென்று முதலில் ஆடிய இங்கிலாந்து அணி முதல் இன்னிங்சில் அணித்தலைவர் குக் (105), ஜோ ரூட் (254) ஆகியோரின் சிறப்பான ஆட்டத்தால் 8 விக்கெட் இழப்புக்கு 589 ஓட்டங்கள் எடுத்து டிக்ளேர் செய்தது.

பின்னர் முதல் இன்னிங்சை தொடங்கிய பாகிஸ்தான் அணி இங்கிலாந்து பந்துவீச்சாளர் கிறிஸ் வோக்ஸின் (4) அபார பந்துவீச்சில் 198 ஓட்டங்களுக்கு சுருண்டது.

பாலோ-ஆன் கொடுக்காமல் தொடர்ந்து விளையாடிய இங்கிலாந்து அணி 2வது இன்னிங்சில் 1 விக்கெட்டுக்கு 173 ஓட்டங்கள் எடுத்திருந்த போது டிக்ளேர் செய்தது.

அணித்தலைவர் குக் 76 ஓட்டங்களுடனும், ஜோ ரூட் 71 ஓட்டங்களுடனும் ஆட்டமிழக்காமல் களத்தில் இருந்தனர். இதனால் பாகிஸ்தான் அணிக்கு 565 ஓட்டங்கள் இலக்காக நிர்ணயிக்கப்பட்டது.

4வது நாள் ஆட்டத்தில் இமாலய இலக்கை நோக்கி களமிறங்கிய பாகிஸ்தான் அணிக்கு தொடக்க வரிசை வீரர்கள் ஏமாற்றினர். அனைவரும் சொற்ப ஓட்டங்களில் ஆட்டமிழக்க பாகிஸ்தான் அணி 234 ஓட்டங்களுக்கு சுருண்டது. இதனால் இங்கிலாந்து அணி 330 ஓட்டங்கள் வித்தியாசத்தில் வெற்றி பெற்றது.

அதிகபட்சமாக ஹபீஸ் 42 ஓட்டங்களும், சபீக் 39 ஓட்டங்களும், மிஸ்பா 35 ஓட்டங்களும் எடுத்தனர். இங்கிலாந்து அணி சார்பில், ஆண்டர்சன், மொயீன் அலி, கிறிஸ் வோக்ஸ் தலா 3 விக்கெட்டுகள் கைப்பற்றினர்.

இதன் மூலம் லாட்ஸ் டெஸ்டில் பாகிஸ்தான் அணி பெற்ற வெற்றிக்கு பதிலடி கொடுத்துள்ளது இங்கிலாந்து அணி.

இந்த வெற்றியின் மூலம் 4 டெஸ்ட் போட்டிகள் கொண்ட தொடரில் இரு அணிகளும் தலா ஒரு வெற்றி பெற்று சம நிலையில் உள்ளனர்.