முன்னாள் பாதுகாப்பு செயலாளர் கோட்டாபய ராஜபக்ஷ உள்ளிட்ட 7 பேருக்கு எதிரான வழக்கு விசாரணை எதிர்வரும் பெப்ரவரி மாதம் 26 ஆம் திகதி வரை ஒத்திவைக்கப்பட்டுள்ளது.
சர்ச்சைக்குறிய எவன்கார்ட் விவகாரம் தொடர்பில் கொழும்பு நீதவான் நீதிமன்றத்தில் நேற்று (செவ்வாய்க்கிழமை) குறித்த வழக்கு விசாரணை எடுத்துக்கொள்ளப்பட்டபோதே இந்த உத்தரவு பிறப்பிக்கப்பட்டுள்ளது.குறித்த விசாரணையின் போது, இந்த வழக்கை டிசம்பர் 05 ஆம் திகதி வரை விசாரிப்பதற்கு மேன்முறையீட்டு நீதிமன்றம் இடைக்கால தடை விதித்துள்ளது.
இதன் காரணமாக குறித்த வழக்கை ஒத்தி வைக்குமாறும் இலஞ்ச ஊழல் ஆணைக்குழு நீதிமன்றத்தில் கோரிக்கை விடுத்தது. அதன்படி வழக்கை பெப்ரவரி மாதம் 26 ஆம் திகதி வரை பிற்போட கொழும்பு மேலதிக நீதவான் பிரியந்த லியனகே உத்தரவிட்டார்.
காலி துறைமுகத்தில் 2012 ஆம் ஆண்டு முதல் 2014 ஆம் ஆண்டு வரையான காலப்பகுதிகளில் எவன்கார்ட் மெரிடைம் நிறுவனத்துக்குச் சொந்தமான மிதக்கும் ஆயுத களஞ்சியசாலையின் நடத்துவதற்கு அனுமதியளித்தன் மூலம் அரசாங்கத்துக்கு 11.4 பில்லியன் ரூபாய் நட்டத்தை ஏற்படுத்தியதாகக் குற்றம் சுமத்தி பாதுகப்பு அமைச்சின் முன்னாள் செயலாளர் கோட்டாபய ராஜபக்ஷ உள்ளிட்ட 8 பிரதிவாதிகளுக்கு எதிராக இலஞ்ச ஒழிப்பு ஆணைக்குழுவால் வழக்கு தாக்கல் செய்யப்பட்டமை குறிப்பிடத்தக்கது.
