நடிகர் ரஜினிகாந்த் முதல்வராக போட்டியிட்டால் தோல்வியுறுவார், கட்சித் தலைவராக மட்டும் செயல்பட்டால் வெற்றி பெறுவார் என குஜராத் சட்டமன்ற தேர்தலை கணித்த ஜோதிடர் பிரகாஷ் அம்முன்னாய தெரிவித்துள்ளார்.
குஜராத்தில் நடந்த சட்டமன்ற தேர்தலில் பாஜக கட்சி தனிப்பெரும்பான்மையுடன் வெற்றி பெறும் என கர்நாடகாவைச் சேர்ந்த ஜோதிடர் பிரகாஷ் அம்முன்னாய சரியாக கணித்திருந்தார்.
இந்நிலையில் நடிகர் ரஜினிகாந்தின் அரசியல் வருகை குறித்து அவர் கூறுகையில், ‘ரஜினிகாந்த் மகர ராசிக்காரர். அவருக்கு சிம்ம லக்கினம் என்பதால், ‘துர்தரா’ யோகம் உள்ளது.
இந்த யோகம் உள்ளவர்களை நேரடியாக எதிர்த்து நின்று யாராலும் வெற்றி கொள்ள முடியாது, பின்னால் இருந்து தான் வெற்றி பெற முடியும்.
அதாவது, ராமாயணத்தில் வாலிக்கு இதுபோன்ற யோகம் இருந்தது. அவரை நேரடியாக எதிர்த்தால் பாதி பலம் போய்விடும் என்பதாலேயே, ராமர் அவரை மறைந்திருந்து வெற்றி கொண்டார்.
எனவே, ரஜினிகாந்த் தன்னுடன் இருப்பவர்களிடம் மிகவும் எச்சரிக்கையாக இருக்க வேண்டும். அவரின் ராசிப்படி, லோக்சபா தேர்தலில் போட்டியிட்டால் 3 முதல் 5 தொகுதிகளை வெற்றி கொள்ள முடியும்.
ரஜினிகாந்தின் ஜாதகத்தின்படி, அவர் எவ்வளவு உயரத்துக்கு சென்றாலும், கால சர்ப்ப தோஷத்தின் காரணமாக அவர் கீழே வந்து விடுவார். எனவே, அவர் தேர்தலில் தன்னை முதல்வராக முன்னிறுத்தக் கூடாது.
கட்சித் தலைவராக இருக்கலாம், வேறு ஒருவரை முதல்வர் வேட்பாளராக முன்னிறுத்தி விட்டு, அவர் கட்சி தலைவராக செயல்படலாம். அவ்வாறு செய்தால் ரஜினிகாந்தின் கட்சி தமிழகத்தில் மிகப்பெரிய சக்தியாக உருவெடுக்கும்.
மேலும் அவருக்கு அரசியலில் மிகப்பெரிய எதிர்ப்புகள் வரும், அத்தனை எதிர்ப்புகளையும் அவர், கட்சி தலைவராக மட்டுமே செயல்பட்டால் முன்னேறி வெற்றிக்கொடி நாட்டுவார் என தெரிவித்துள்ளார்.
