கடந்த வெள்ளிக்கிழமை நடந்த சம்பவம் ஒன்று காவற்துறையினரால் இன்று தான் வெளியிடப்பட்டுள்ளது. இயந்திரத்துப்பாக்கியுடனும், முகம் முற்றாக மறைக்கும் முகமூடிக் குல்லாவுடனும், கையுறையுடனும் சிற்றுந்தில் வந்த நபர் காவற்துறையினரால் மடக்கப்பட்டுள்ளார்.
ஒரு Clio சிற்றுந்தில், வந்த நபர், காவற்துறையினரின் சோதனைக்காக வாகனத்தை நிறுத்துவது போல் நிறுத்தி விட்டு மீண்டும் வேகப்படுத்தி உள்ளார். பக்கப்பார்வைக் கண்ணாடி அங்கிருந்த காவற்துறை வீரர் ஒருவரைத் தாக்கியும் உள்ளது. அதனைத் தொடர்ந்து எதிர்த்திசையில் வந்த சிற்றுந்துடன் கட்டுப்பாட்டை இழந்து இவர் மோதியுள்ளார். உடனடியாகக் காவற்துறையினர் மேலதிக வலுவுடன் இவரைக் கைது செய்துள்ளனர்.
இவர் தனக்கு அருகில் உள்ள இருக்கையில் செக் நாட்டின் தயாரிக்கான Skorpion ரக இயந்திரத் துப்பாக்கியினை ரவைக் கூட்டில் குண்டுகள் நிரப்பிச் சுடு நிலையில் தயாராக வைத்திருந்துள்ளார். விபத்திற்குள்ளாகிய அதிர்ச்சியில், தாக்குதல் எதுவும் செய்வதற்கு முன்னர் இவர் மடக்கிப் பிடிக்கப்பட்டுள்ளார். இவர் ஆர்ஜெந்தொய்யினைச் சேர்ந்தவர் என்றும் 38 வயதுடையவர் என்றும் காவற்துறையினர் தெரிவித்துள்ளனர்.
